Бугун,

  • USD 11014.01
  • RUB 191.8
  • EUR 10674.78

Турколог олим Андрей Кубатиннинг ўлими бўйича жиноий иш очиш рад қилинди, дея хабар бермоқда Бош прокуратура матбуот хизмати.

Фото: Facebook / Андрей Кубатин

Фото: Facebook / Андрей Кубатин

Қайд этилишича, 2021 йил 28 январь куни ижтимоий тармоқларда (Facebook) фуқаро Клара Сахарованинг укаси 1984 йилда туғилган Кубатин Андрей Викторович 2020 йил 13 октябрь куни Зангиота туманида жойлашган Коронавирус инфекцияси билан касалланган беморларни даволашга мўлжалланган махсус 2-сонли Зангиота шифохонасига ётқизилганлиги, шифокорлар томонидан ўтказилган муолажаларга қарамасдан 2020 йил 29 октябрь куни вафот этганлиги ва бу ҳолатда тиббиёт ходимларининг ҳаракатига баҳо бериш ҳақида мурожаати тарқалган.

Мазкур ҳолат юзасидан Зангиота туман прокуратураси томонидан терговга қадар текширув ҳаракатлари ўтказилиб, 2021 йил 28 январь куни Республика суд-тиббий экспертиза илмий-амалий маркази Тошкент вилояти филиали суд-тиббиёт экспертизасида комиссион суд-тиббий экспертизаси тайинланган.

Республика суд-тиббий экспертиза илмий амалий маркази Тошкент вилояти филиали комиссион экспертизасининг 16-сонли хулосасига кўра, 1984 йилда туғилган Андрей Кубатин COVID-19 инфекцияси оғир кечиши, асорати икки томонлама шифохонадан ташқари интерстициал полисегментар пневмония, нафас етишмовчилиги  3-даражаси, эндоген интоксикация, ўпка шиши, ўпка-юрак қон томири етишмовчилиги 3-даражаси, ҳамроҳ гипертония касаллиги, семизлик 1—2-даражаси, шунингдек, полиорган етишмовчилик туфайли вужудга келган ўткир ўпка-юрак етишмовчилигидан вафот этган.

Шунингдек, Ўзбекистон Соғлиқни сақлаш вазирлиги томонидан ўтказилган хизмат текшируви хулосасида бемор Кубатинга нисбатан ташхис тўғри қўйилганлиги кўрсатилган.

Шу билан бирга, хизмат текшируви ҳамда экспертиза хулосаларида марҳум Андрей Кубатиннинг ўлимига сабаб бўлган ҳолатлар, яъни икки томонлама субтотал, интерстициал зотилжам оқибатида вужудга келган оғир даражали нафас ва юрак-қон томири етишмовчилиги, тўқималар оғир даражадаги гипоксияси унинг ҳаётлик даврида 2-сонли Зангиота махсус клиника шифокорлари томонидан аниқланган бўлиб, текширув ва даво муолажалари Ўзбекистон Соғлиқни сақлаш вазирлигининг 2020 йил 20 сентябрдаги 8-сонли «Коронавирус инфекцияси билан касалланган беморларни профилактика, диагностика, даволаш ва реабилитацияси бўйича вактинчалик миллий методик тавсияси»га асосан тўғри ва асосли ўтказилганлиги қайд этилган.

Терговга қадар текширув натижасига кўра, туман прокуратураси томонидан 2021 йил 28 февраль куни жиноят ишини қўзғатишни рад этиш ҳақида қарор қабул қилинган.

Эслатиб ўтамиз, ўзбекистонлик таниқли турколог Андрей Кубатин 29 октябрь куни коронавирус оқибатида вафот этган.

Бундан аввал марҳум турколог Андрей Кубатин қамоқда қаттиқ қийноқларга солингани айтилгани ҳамда суд марҳум олим Андрей Кубатиннинг оиласига компенсация ундириш тўғрисидаги даъвони рад этгани ҳақида хабар берилганди.

Изоҳ
Асосий янгиликлар