Қашқадарё вилояти маркази Қарши шаҳрининг «Равоқ» маҳалласи, Нуробод кўчасида яшовчи 9 та хонадон вакиллари «Қашқадарё соҳили» сайилгоҳи барпо этилганидан буён хонадонини сув босиб кетаётганини, ҳатто яшаб турган уйлари девори ҳам ёрилиб, фарзандларининг тақдири хавф остида қолаётганини айтмоқда.
«Дарё»га қилинган мазкур мурожаатга кўра, мухбир Отабек Қўлдошев айтилган манзилда бўлиб, аҳоли билан суҳбатлашди.
«Биз ‘Қашқадарё соҳили’ сайилгоҳи барпо этилганидан бери дамба тўсилган пайтда хонадонларимизни сув босиб кетишидан азият чекиб яшаётган фуқаролармиз. Бу масала бўйича ўтган беш йил давомида мурожаат қилмаган ташкилотимиз, шикоят қилмаган раҳбаримиз қолмади. Ҳатто вилоят ҳокими Зоир Мирзаевнинг шахсан ўзи ва шаҳар ҳокими Нормўмин Холбоев 2020 йилда келиб, вазиятни ўз кўзлари билан кўришди. Сув тошишидан азият чекаётган 18 та хонадоннинг 9 тасини бошқа жойга кўчириб, қолган 9 та хонадонни 2021 йилнинг март ойи бошида тўлиқ кўчирамиз деб ваъда беришганди. Лекин ҳалигача бирор-бир ҳаракат йўқ. Соҳилда сув тўсилиб, дамба қилингач, уйларимизга яна сув тоша бошлайди», — дейди аҳоли вакилларидан бири Нурия Эргашева.
Нурия Эргашеванинг айтишича, улар вилоят ҳокими ва шаҳар ҳокимининг маҳаллага ташрифида берилган ваъдага кўра, 2020 йил якунидан бошлаб Қарши шаҳар ҳокимлигига мурожаат қилиб келмоқда. Бироқ на шаҳар ҳокимлиги ва на вилоят ҳокимлиги масъуллари мазкур мурожаатга эътибор қаратган.
«Яшаб турган уйларимиз девори ёрилиб, чўка бошлаганидан қўрқиб ҳар куни Қарши шаҳар ҳокимлиги ҳамда вилоят ҳокимлигига мурожаат қилиб, ёрдам сўраймиз. Аммо мурожаатимизга ҳеч ким тайинли жавоб бермаяпти. Биз эса таҳликада яшашда давом этяпмиз. Нега биз хавфсиз жойга кўчирилмаяпмиз? Ёки раҳбарлар бирор-бир фожиани кутишяптими?», — дейди Нурия Эргашева.
Шу маҳаллада яшовчи Нафосат Амирқулованинг айтишича, улар истиқомат қилаётган уйлар аҳволини кўздан кечирган Фавқулодда вазиятлар бошқармаси ходимлари бу уйларда яшаш инсон учун хавфли эканлигини айтиб, «имкон қадар фарзандларингизни деворлари ёрилган хоналарда қолдирманг», дея таъкидлаган.
«Дастлаб шу муаммо кўтарилганда, бундан икки-уч йил илгари қўшниларимиз шу ердан кўчишга қарор қилишганида шахсан мен қарши чиққанман ва шу ерда яшаб қолишимни айтганман. Аммо кейинги икки йилда деворларнинг ёрилиши ва уйимизнинг чўкиши бизни қўрқитиб қўйди. МЧС ходимлари ҳам ҳовлимизни кўздан кечиришганида ‘авария ҳолатидаги уйларда яшаяпсизлар, имкон қадар фарзандларингизни деворлари ёрилган хоналарда ётқизманг’, дея таъкидлашган. Бу гаплардан сўнг биз янаям қўрқиб қолдик», — дейди Нафосат Амирқулова.
Аҳоли вакилларининг айтишича, ‘Қашқадарё соҳили’ сайилгоҳи 2016 йил қуриб фойдаланишга топширилганидан сўнг, ҳосил қилинган дамба суви улар яшаб турган ҳовлиларга тоша бошлаган ва хонадон деворларининг ёрилишига сабаб бўлган.
«2016 йил дамба қурилгач, шу аҳволга туша бошладик. Аслида биз шаҳримиз чиройли бўлишига қаршимасмиз, бундан хурсанд бўламиз. Айнан шу дамба қурилиб, уйимиз ёнида дам олиш маскани қурилганидан хурсанд бўлганмиз. Аммо кейинчалик бу гўзаллик биз учун катта хавф эканлигини билдик. Мана шундай гўзалликка кимнингдир Ватанини вайрон қилиш эвазига эришилишига қаршимиз», — дейди суҳбатдош.
Нафосат Амирқулованинг қўшимча қилишича, аҳолининг шу ҳолатидан хабар топган вилоят раҳбари ва Қарши шаҳри ҳокими улардан ариза олиб, тез орада 18 та хонадон бошқа хавфсиз ҳудудга кўчирилишини маълум қилган. Бироқ 18 та хонадоннинг 9 таси кўчирилгач, қолган 9 та хонадон ҳақида эсдан чиқаришган.
«Берилган ваъдани эслатиб, шаҳар ҳокимлигига қайта-қайта мурожаат қиляпмиз. Мурожаат хатимизни ҳокимликка берсак, бир ҳафта давомида бир хонадан иккинчи хонага ўтмаган экан. Ҳокимлик масъуллари мурожаатларга шу даражада бефарқ эканки, мурожаатимиз тақдири ҳақида сўрасак, ‘бизга мурожаатингиз ҳали келмаган’, дейишди. Шу жойда яшаб қолишга ҳаракат қиляпмиз. Ҳар йили қайта-қайта қурилиш қиляпмиз, аммо бефойда. Илтимос раҳбарлар, ҳеч бўлмаса ёш фарзандларимизга раҳмингиз келсин», — дейди Нафосат Амирқулова.
Шундай таҳликаю, қўрқувда яшаётган аҳоли вакилларидан яна бири Санобар Шодиеванинг таъкидлашича, кун сайин вазият ёмонлашмоқда. Масъуллар эса сукут сақлашни, ҳаракатсизликни лозим топган.
«Энг мустаҳкам қурилган ертўламизга ҳам сув кирди. Ертўлада сақлаётган нарсаларим сув тагида қолди. Ҳаммаси яроқсиз ҳолга келиб қолди. Уйларимизнинг деворларини-ку, айтмасак ҳам бўлади. Кун сайин ёриқлари катталашиб бормоқда», — дейди София Худоёрова.
Шу маҳаллада яшовчи Шавкат Жумаевнинг айтишича, янги қурган уйининг деворлари ҳам ёрила бошлаган.
«Уйимизнинг барча деворлари ёрилиб кетяпти. Уй эшикларини ёпсак, деворлар қимирлайди. Бу уйларда яшаб жонимизни хатарга қўйяпмиз. Кўчиб кетайлик десак, имкониятимиз етмайди. Масъуллар эса вазиятни жим туриб кузатишмоқда», — дейди Шавкат Жумаев.
Аҳолининг мазкур шикоятига жавоб олиш мақсадида Қарши шаҳар ҳокимлиги ахборот хизмати раҳбари Умид Жабборов билан боғланиб, масъулларга саволимизни етказишни ва изоҳ беришларини сўрадик. Масъуллар иш билан оворалигини айтган шаҳар ҳокими матбуот котиби «аҳолини бошқа жойга кўчиришга ваъда берилмаганини» айтиб, аниқроқ маълумотни мутасаддилардан сўраб беришини билдирди. Бироқ айтилган муддатда бу ҳақда маълумот бермади.
Вилоят ҳокимлиги ахборот хизмати раҳбари Аҳрор Содиқов эса мазкур вазиятдан вилоят ҳокими Зоир Мирзаевнинг хабари борлигини, муаммо тез орада ечим топишини айтди.
Изоҳ (0)