Ўзбекистонда Корея ва Европага ишга юборишни ваъда қилиб, фуқароларнинг пулларини ўзлаштирган International Job Organization хусусий бандлик агентлиги раҳбарлари устидан суд ҳукми эълон қилинди.
Олий суд матбуот хизматининг маълум қилишича, 23 март куни жиноят ишлари бўйича Шайхонтоҳур туман судида хусусий бандлик агентлиги раҳбарлари ва унга алоқадор шахсларга нисбатан жиноят ишини кўриб чиқиш бўйича очиқ суд жараёни ниҳоясига етди.
Эълон қилинган суд ҳукмига кўра, International Job Organization таъсисчиси ва директори Ш.Абдураҳмоновга 9 йил 6 ой озодликдан маҳрум қилиш жазоси тайинланди.
International Job Organization’нинг:
- Андижон вилояти филиали менежери Г.Думановага 6 йил 1 ой;
- Хоразм вилояти филиали раҳбари Ғ.Ҳасановга 8 йил 1 ой;
- Тойлоқ тумани филиали раҳбари Ж.Пардаевга 8 йил 1 ой;
- Сурхондарё вилояти филиали раҳбари Ж.Турсуновга 8 йил 1 ой;
- Жиззах шаҳар филиали раҳбари Х.Уразолиевга 8 йил 1 ой;
- Наманган шаҳар филиали раҳбари Д.Исломовага 6 йил 1 ой озодликдан маҳрум қилиш жазоси тайинланган.
Ушбу бандлик агентлигига алоқадор бўлган «Яркоэ Будушее» раҳбари Ш.Носировга 8 йил, JB World Company раҳбари Б.Жалоловга 9 йил 6 ой озодликдан маҳрум қилиш жазоси тайинланган.
Уларнинг барчаси жазони умумий тартибли колонияларда ўташи белгиланди. А.Салмоновга (ишсиз) 2 йил муддатга ахлоқ тузатиш ишлари жазоси тайинланган.
Олий суд матбуот хизматининг қайд этишича, жиноят оқибатида 2368 нафар жабрланувчига етказилган 17 063 069 928 сўм моддий зарар судланувчилар Ш.Абдураҳмонов, Б.Очилов, Г.Думанова, Ж.Пардаев, Х.Уразолиев, А.Аҳмаджонов, Д.Исломова, Ғ.Ҳасанов, Ж.Турсунов, А.Шукуров, Б.Пўлатов ва Б.Жалоловдан солидар тартибда ундирилиши белгиланди.
Жиноят оқибатида 6 нафар жабрланувчига етказилган 172 545 183 сўм моддий зарар судланувчилар Ш.Носиров ва Б.Жалоловдан солидар тартибда ундирилиши белгиланди.
Судланувчи Б.Жалоловдан жабрланувчи С.Ҳамидовнинг фойдасига 26 264 800 сўм ва О.Қобиловнинг фойдасига 34 669 536 сўм ундирилиши белгиланди.
Жиноят иши юзасидан хатланган 1 104 778 352 сўм пул ва 12 678 426 462 сўмга баҳоланган мол-мулклар пропорсионал тартибда етказилган моддий зарарни қоплашга қаратилиши ҳамда ундирилиши лозим бўлган зарар миқдоридан чегирилиши белгиланди.
Эслатиб ўтамиз, 1993 йил Қирғизистонда туғилган, фуқаролиги бўлмаган Ш.Абдураҳмонов Тошкент шаҳар, Юнусобод тумани, Аҳмад Дониш кўчаси, 2-мавзеда жойлашган фаолият турига кўра Ўзбекистондан ташқарида иш изловчи фуқароларни хорижий давлатда ишга жойлаштириш, бўш иш ўринлари ҳақида маълумотлар бериш ҳисобланган International Job Organization хусусий бандлик агентлиги учун 2019 йилнинг 19 апрель куни Бандлик ва меҳнат муносабатлари вазирлигидан лицензия олиб, жамиятга раҳбарлик қилиб келган.
Жамият ташкил топган кундан бугунги кунга қадар фирибгарлик йўли билан ўзгаларнинг мулкини қўлга киритишни мақсад қилиб, республиканинг барча вилоятларида ваколатхона очган. Турли ОАВ орқали жамият ҳақида эълонлар бериб, бош офис ва ваколатхонага ишга жойлашиш бўйича мурожаат қилиб келган фуқароларни Жанубий Корея ва Европа давлатларига ишга юборишини ваъда қилган.
Аммо бугунги кунга қадар ушбу хусусий бандлик агентлиги томонидан бирорта ҳам фуқаро Ўзбекистондан ташқарида ишга жойлаштирилмаган.
Изоҳ (0)