Бугун,

  • USD 11014.01
  • RUB 191.8
  • EUR 10674.78

Сувайш каналида кетма-кет беш кундан буён Ever Given кемасини саёзликдан чиқариб олишга уринишмоқда. Миср президенти кемани юклардан бўшатишга тайёрланишни буюрди, деб ёзади Meduza.

Россиянинг «Ресурс-П» сунъий йўлдоши орқали коинотдан олинган сурат. «Сувайш канали, Ever Given ҳозирча саёзликда қолмоқда», — деб ёзди «Роскосмос» раҳбари Дмитрий Рогозин.

Россиянинг «Ресурс-П» сунъий йўлдоши орқали коинотдан олинган сурат. «Сувайш канали, Ever Given ҳозирча саёзликда қолмоқда», — деб ёзди «Роскосмос» раҳбари Дмитрий Рогозин.
Фото: Twitter / @rogozin

Сувайш каналида беш кундан буён Ever Given юк кемасини саёзликдан чиқариб олишолмаяпти. Сувайш канали бошқармаси бошлиғи Усама Раби маълум қилишича, галма-галдан иккита операция ўтказилмоқда: дастлаб 12 соат давомида экскаваторлар ишлаб тупроқни олиб ташламоқда, сўнг яна 12 соат мобайнида шатакчи кемалар кемани жойидан силжитишга уринмоқда. Вақтнинг бундай тақсимланиши сувнинг кўтарилиши ва пасайиши туфайли шатакчи кемалар доим ҳам ишлай олмаслиги сабабли зарурдир. Операцияда жами 13 та шатакчи кема қатнашмоқда. Ҳафта давомида ишлаб келган 11 та кемага 28 март, якшанба куни яна иккитаси келиб қўшилди, шунингдек, яна бир нечта сузувчи экскаваторлар ва соатига 2000 метр куб тупроқни кавлашга қодир тупроқ қазувчи қурилма ҳам операцияга қўшилди.

27 март куни кечқурун контейнер кемасини биринчи марта бир неча метрга силжитишга муваффақ бўлишди. Бу юз берган вақтда шатакчи кемалар капитанлари қувончдан бир вақтда биргаликда ўз сиреналари билан сигнал берди.

Миср президенти Абдул ас-Сисий контейнер кемасини юклардан бўшатишга тайёргарлик кўришни бошлашни буюрди. Усама Раби айтишича, президент биринчи ва иккинчи сценарийларнинг муваффақиятсизликка учрашини кутмасдан, учинчи сценарийга тайёрланишга қарор қилган. Биринчи ва иккинчи сценарийлар деганда Ever Given кемасини шатакчи кемалар ҳамда экскаваторлар ёрдамида тупроқни қазиш орқали чиқариб олишга уринишлар назарда тутилмоқда. Шунингдек, ас-Сисий бортда турган 18 мингта контейнерларнинг баъзиларини туширишда зарур бўладиган махсус ускунадан фойдаланишга ҳам рухсат берди. Миср президентининг денгиз портлари масалалари бўйича маслаҳатчиси Муҳаб Мамиш маълум қилишича, кемадан юкларни тушириш 30 март куни бошланиши мумкин. «Кемадан юкларни тушириш эртадан кейин, яъни сешанба куни, кемани шатакчилар ёрдамида тортиб чиқариш имкониятлари тугаб битганидан кейин бошланади», — деди у.

Сувайш каналида 369 та кема навбатда туриб қолди. Уларнинг катта қисми — контейнер кемалари, шунингдек, нефть ва суюлтирилган табиий газ ортилган танкерлар. Уларга юкланган маҳсулотларнинг умумий қиймати қарийб 10 миллиард долларни ташкил этади. Сувайш канали бошқармасида Мисрнинг Ever Given билан боғлиқ вазиятдан кўраётган талафоти кунига 14 миллион долларга баҳоланмоқда. Бошқарма бошлиғи Усама Раби таъкидлашича, Миср тирбандликда турган кемаларга каналдан ўтиш тўлови учун чегирмалар таклиф қилади.

Ишлар қанча давом этиши ҳамон аниқ эмас. Дастлаб кемани чиқариб олиш бир неча кун вақт олиши режалаштирилган эди, аммо энди баъзи мутахассислар вазият бир неча ҳафтага чўзилишини тахмин қилмоқда. Reuters қайд этишича, агар операция чўзилиб кетиши аниқ бўлиб қолса, каналда тирбандликда қолиб кетган кемалар эгалари уларни Яхши Умид бурни орқали Африкани айланиб ўтадиган йўл билан олиб кетиши мумкин.

Денгиз кемаларини кузатиш сервисларига қараганда, кўпчилик аллақачон шундай йўл тутмоқда. Аммо агар Сувайш каналидан Ўрта Ер денгизи орқали Европанинг энг йирик Роттердам портигача бўлган йўл ўртача 11 кун вақт олса, айланма йўлга камида яна 26 кун кетади. Йўлга кетган қўшимча ҳар бир кун учун кема эгаси ёқилғига бир неча ўн минг доллардан сарфлаши керак бўлади. Қизил денгизда туриб қолиш ҳам қўшимча харажатларга олиб келади, чунки ҳар қандай вазиятда ҳам экипажга маош тўлаш керак бўлади.

Изоҳ
Асосий янгиликлар