Ўзбекистоннинг марказий ҳудудларида 28 март куни куннинг биринчи ярмида кучли ёғингарчилик кузатилгани ҳақида хабар берилган эди. Хусусан, Навоий вилоятининг Нурота туманида сел келиши, вилоятнинг бошқа — Хатирчи ва Кармана туманларида сув тўпланиши, тошқин ҳолатлари қайд этилганди. Навоий вилояти ҳокимлиги ҳамда вилоят фавқулодда вазиятлар бошқармаси юқорида кўрсатилган ҳудудларда фуқароларга ва биноларга ҳеч қандай салбий таъсир кўрсатилмаганини маълум қилди.
Қайд этилишича, шу куни соат 09:20 дан 09:35 қадар кузатилган ёғингарчилик оқибатида вилоятнинг Навоий шаҳри Кармана ва Хатирчи тумани ҳудудидаги айрим йўл ва аҳоли томорқаларига сув тўпланган. Жумладан, Кармана туманида 21 та ҳовли томорқаларига, Хатирчи туманида 15 ҳовли томорқаларига сув кириши ҳамда Навоий шаҳри марказий деҳқон бозори ҳудудида сув тўпланиши кузатилган.
Аҳоли ҳовлилари ва кўчаларда тўпланган сувларни бартараф этиш, ариқ ва зовурларга йўналтириш ҳамда аҳолига тушунтириш ишларини олиб бориш мақсадида вилоят фавқулодда вазиятлар бошқармаси ва унинг ҳудудий бўлинмаларидан 14 та техника ва 72 нафар шахсий таркиб, шундан 10 та ёнғин ўчириш автомобили, 4 та махсус техника ва 11 та мотопомпа жалб этилган.
Бундан ташқари, шаҳар-туман ҳокимликларининг фавқулодда вазият давлат тизими навбатчилик қисмлари билан мунтазам ахборот алмашинуви амалга ошириши таъминланиб, вазият назоратга олингани таъкидланган.
Маълум қилинишича, вилоятнинг Хатирчи тумани ҳудудидаги Учқаросой, Тасмачисой, Олтинсой, Майдонсой, Миршодсой, Полвонтасой, Боғчикалонсой, Пўлатчи I, Пўлатчи II, Аччиқсағанақсой, Жавсансой сойларида сел сувлари оқиб ўтмоқда. Ушбу сойлардан келаётган сувлар аҳоли ва ҳудудларга ҳеч қандай талафот етказмаган.
«Юзага келган вазиятлар оқибатида жабрланганлар ва ҳалок бўлган фуқаролар йўқ. Ҳолат юзасидан қўшимча маълумотлар бериб борилади», — дейилади эълон қилинган расмий баёнотда.
Эслатиб ўтамиз, «Ўгидромет» 29 март куни ҳам ёмғир ёғиши, баъзи жойларда кучли бўлишини маълум қилган.
Изоҳ (0)