Таълим сифатини назорат қилиш давлат инспекцияси «Тошкент материалшунослик университетини ташкил этиш тўғрисида»ги Вазирлар Маҳкамаси қарори лойиҳасини муҳокамага қўйди.
Ҳужжат лойиҳасига кўра, материалшунослик ва янги материаллар технологияси, шунингдек, бошқа соҳаларда юқори малакали олий маълумотли кадрлар тайёрлаш таълим муассасасининг асосий вазифа ва йўналиши этиб белгиланади.
Университет битирувчиларига Ўзбекистонда олий маълумот тўғрисидаги ҳужжат сифатида эътироф этиладиган давлат намунасидаги диплом берилади.
Шу билан бирга, олийгоҳда таълимни рақамли технологиялар, масофавий таълим хизматлари, вебинарлар, онлайн ўқитиш, «блендедлеарнинг» ва бошқа замонавий таълим технологияларидан фойдаланган ҳолда кундузги, сиртқи ва кечки таълим шаклида амалга ошириш кўзда тутилган.
Қайд этилишича, университет Тошкент шаҳри Олмазор тумани Мирзо Ғолиб кўчаси 7а–уй манзилида очилади.
Университетга кадрларга бўлган талаб ва эҳтиёжларни ҳамда республиканинг ижтимоий-иқтисодий ривожланиш истиқболларини ҳисобга олган ҳолда мустақил равишда янги бакалавриат таълим йўналишлари ва магистратура мутахассисликларини очишга рухсат берилади.
Эслатиб ўтамиз, олий таълим соҳасида соғлом рақобат муҳитини шакллантириш, олий таълим билан қамраб олиш даражасини ошириш мақсадида Ўзбекистоннинг ҳар бир ҳудудида 2021 йил 1 сентябргача камида биттадан нодавлат ОТМ очилиши маълум қилинган.Аввалроқ Тошкентда Япония рақамли университети ташкил этилиши, пойтахтда Санкт-Петербург давлат университети филиали очилиши ҳақида хабар берилган эди.
Изоҳ (0)