Намангандаги қишлоқ врачлик пунктида безорилик содир этилди, деб хабар бермоқда ИИВ Тергов департаменти.

Фото: ИИВ Тергов департаменти

Маълум қилинишича, 23 март куни соат 11:00 ларда Чортоқ тумани «Сарой» МФЙ ҳудудида жойлашган қишлоқ врачлик пунктига 33 ёшли М.Й. ва 35 ёшли Ш.Й. келиб, маъмуриятга ушбу бинони бўшатиб беришни, улар замонавий клиника қурмоқчи эканлигини билдирган.

У ерда даволанаётган 37 ёшли Ф.Т. ва 31 ёшли А.М. уларни турли сўзлар билан ҳақорат қилиб, танасининг дуч келган жойига уриб, жароҳат етказган. Суд тиббий экспертиза хулосасида М.Й. ҳамда Ш.Й.да енгил турдаги тан жароҳатлари мавжудлиги кўрсатилган.

Ҳолат юзасидан Чортоқ туман ИИБ ҳузуридаги Тергов бўлинмаси томонидан Ф.Т. ва А.М.га нисбатан Жиноят кодексининг 277-моддаси 2-қисми «б» банди (бир гуруҳ шахслар томонидан безорилик содир этиш) билан жиноят иши қўзғатилиб, гумон қилинувчи тариқасида жалб қилинган.

Ҳозирда тергов давом этмоқда.

Департамент бу турдаги жиноятлар учун Жиноят кодексининг нормаларига кўра, 300 соатдан 360 соатгача мажбурий жамоат ишлари ёки 1 йилдан 3 йилгача озодликни чеклаш ёхуд 3 йилгача озодликдан маҳрум қилиш жазоси тайинланишини эслатиб ўтган.