Москвада блогерлар ҳайдовчининг ҳолатини видеога олиш мақсадида такси хизматига тегишли BMW 7-Series’ни миниб қочди, деб ёзади CARakoom. Ҳайдовчининг бу борадаги ҳаракати ростдан ҳам кутилмаган бўлди: эркак машина ўғрилари устидан полицияга ариза ёзган ва эндиликда улар жиноий жавобгарликка тортилади.
Россия ИИВ матбуот хизматининг маълум қилишича, уч нафар йигит Пресня дарёси бўйида жойлашган кўчага бизнес-классдаги таксини чақирган. Буюртмага BMW 7-Series етиб келган — полициянинг аниқлик киритишича, машина 3,5 миллион рублдан (46 минг доллар) қимматроқ туради. Йигитларнинг икки нафари салонга дарҳол ўтирган ва ҳайдовчидан сумкани юкхонага жойлашда ёрдам беришини сўраган. Ҳайдовчи чиқиши билан йигитлардан бири рулга ўтириб, машинани бошқариб кетган.
Орадан бир неча дақиқа ўтгач, йигитлар қайтиб келиб, ҳайдовчига шунчаки ҳазиллашганини айтишган. Блогерлар шу орқали қизиқарли видео олмоқчи бўлган. Бироқ жабрланувчи ҳазилни тушунмаган ва полицияга ариза ёзган.
Йигитларнинг учаласи ҳам шу куннинг ўзидаёқ қўлга олинган, «ҳазилкаш»лардан бири ҳибсга, қолганлари уй қамоғига жойлаштирилган. Блогерларга нисбатан Россия Жиноят кодексининг «Ўғирлик мақсадисиз автоуловни ёки бошқа транспорт воситасини ноқонуний олиб қўйиш» моддаси билан жиноят иши қўзғатилган. Ушбу модда бўйича максимал жазо — етти йилгача озодликдан маҳрум этиш.
Изоҳ (0)