Тошкентда жамоат транспорти учун алоҳида ажратилган биринчи йўл қандай кўринишда бўлиши намойиш этилди (фото, видео)

«Тошшаҳартрансхизмат» пойтахтда жамоат транспорти учун биринчи ажратилган йўлакчани яратиш лойиҳасини намойиш этди, деб хабар беради «Podrobno.uz».

Қайд этилишича, жамоат транспорти учун ажратилган йўлакларни ташкил этиш лойиҳаси Тошкент шаҳар халқ депутатлари Кенгаши томонидан 34-сессияда кўриб чиқилди. Ушбу лойиҳани Бобур кўчасида – Тошкент халқаро аэропортидан Сеул кўчасигача тест режимида амалга ошириш режалаштирилган.

Кўчанинг узунлиги тахминан 3 километрни ташкил этиб, 8 та қисм (полоса)дан иборат. Ҳозирда кўча бўйлаб жамоат транспорти сифатида 18 та автобус ва бешта йўналишли такси ҳаракатланади.

Жамоат транспорти учун ажратилган қатнов қисмларининг ташкил қилиниши автобуслар ва йўналишли таксиларнинг йўловчи ташиш тезлигини 25 фоизга оширади. Бу, шубҳасиз, йўловчиларни ташиш бўйича хизматларга ижобий таъсир кўрсатади ва тирбандликни камайтиришга ёрдам беради.

Лойиҳа бўйича фикрларингизни бу ерда қолдиришингиз мумкин.

Бундан аввал Тошкентдаги жамоат транспортлари ҳаракатини кўрсатишга мўлжалланган мобил дастурлар маршруткалар ҳаракатини ҳам кўрсатишни бошлагани, йирик шаҳарлардаги тирбандликларни ҳайдовчисиз капсула ёрдамида бартараф этиш таклиф қилингани ҳамда Тошкентда шахсий автомобилни метро ёнидаги автотураргоҳга қўйиб, йўлни жамоат транспортида давом эттириш бўйича тизим ишлаб чиқилаётгани ҳақида хабар берилганди.