Нажмиддинхўжа Шарипов Тошкент вилояти ҳокимининг инвестиция ва ташқи савдо масалалари бўйича ўринбосари лавозимига тайинланди. Бу ҳақда вилоят ҳокимлиги матбуот хизмати хабар берди.
Тайинловга қадар у 2019 йилнинг январидан буён Монополияга қарши курашиш қўмитаси раиси лавозимида фаолият юритиб келаётганди.
Нажмиддинхўжа Шарипов ушбу лавозимда 2019 йилдан буён ишлаб келаётган Жамшид Абдусаломов ўрнини эгаллади.
Эслатиб ўтамиз, Халқ депутатлари Тошкент вилояти кенгашининг навбатдан ташқари 28-сессиясида Шавкат Мирзиёев Даврон Ҳидоятовни вилоят ҳокими лавозимига тавсия қилди. Тошкент шаҳар ҳокимининг архитектура, капитал қурилиш ва коммуникацияларни ривожлантириш масалалари бўйича биринчи ўринбосари лавозимида фаолият юритган Даврон Ҳидоятов 2020 йилнинг 30 январида Тошкент вилояти ҳокими вазифасини бажарувчи этиб тайинланганди.
Унинг қишлоқ ва сув хўжалиги масалалари бўйича биринчи ўринбосари лавозимига Жиззах вилояти Дўстлик тумани ҳокими лавозимида ишлаб келган Улуғбек Узоқов, шаҳарлар инфратузилмасини ривожлантириш, ободонлаштириш ва коммунал хўжалик масалалари бўйича ўринбосари лавозимига Барҳаёт Мелиев тайинланган. Ёшлар ишлари агентлиги Тошкент вилояти бошқармаси бошлиғи лавозимида ишлаб келган Зуҳра Мирғозиева ҳокимнинг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари лавозимига тайинланган.
Изоҳ (0)