Тошкент вилоятида 1000 доллар порани олмаган кадастр ходими 10 миллион сўм пул ва сиҳатгоҳга 2 кишилик йўлланма билан рағбатлантирилди. Бу ҳақда Давлат солиқ қўмитаси ҳузуридаги Кадастр агентлиги хабар берди.
Маълум қилинишича, 17 февраль куни Кадастр агентлиги Зангиота туман бўлими бошлиғи вазифасини бажарувчи Азамат Адиловга енгил типдаги иссиқхона ташкил этиш учун ажратилган ер майдонининг топографик съёмкасини тасдиқлаб бериш эвазига 1000 АҚШ доллари миқдорида пора таклиф қилинган.
Бўлим бошлиғи пора таклиф қилаётган фуқаро тўғрисида Зангиота туман Иқтисодий жиноятларга қарши курашиш департаментига хабар берган ва фуқаронинг ноқонуний хатти-ҳаракатлари фош этилган.
«Бугун юқоридаги ташаббускор ходим Кадастр агентлигининг Тошкент вилоятидаги барча раҳбар ва ходимлар иштирокида 10 миллион сўм пул мукофоти ҳамда Хонобод сиҳатгоҳига 2 кишилик йўлланма билан рағбатлантирилди. Ушбу ҳолат юртимизда коррупцияга қарши олиб борилаётган курашнинг кичик бир намунасидир», — дейилади хабарда.
Эслатиб ўтамиз, 2020 йилда Қашқадарёда 1000 доллар пора олмаган ИИБ ходимига 15 миллион сўм пул мукофоти берилганди.
Изоҳ (0)