Қирғизистон бош вазири Улуғбек Марипов 25 март, пайшанба куни Тошкентга келди. Уни пойтахт халқаро аэропортида Ўзбекистон ҳукумати раҳбари Абдулла Арипов кутиб олди.
ЎзАнинг хабар беришича, Улуғбек Марипов 25—26 март кунлари Тошкентда ўтказиладиган Ўзбекистон ва Қирғизистон ўртасида икки томонлама ҳамкорлик бўйича ҳукуматлараро қўшма комиссиянинг навбатдаги йиғилишида қатнашади. Йиғилиш якунлари бўйича ҳужжатлар имзоланиши кўзда тутилган.
Тошкент шаҳар ҳокимлиги матбуот хизматининг қўшимча қилишича, қўшни давлат ҳукумати раҳбари ташриф давомида пойтахтдаги «Texnopark» мажмуаси, IT-Park, Crafers ва Ardent Foods фабрикалари, Golden Moon ҳамда Orient Ceramic заводлари, Қирғизистоннинг Тошкент шаҳридаги элчихонасининг янги биносида бўлиши кўзда тутилган.
Қайд этиш жоиз, бу Ўзбекистон ва Қирғизистон ҳукумат раҳбарларининг биринчи учрашуви эмас — Абдулла Арипов Евросиё ҳукуматлараро кенгашининг йиғилиши доирасидаги иш сафарида Улуғбек Марипов билан учрашган, ундан аввалроқ, февраль ойи бошида Мариповни Қирғизистон бош вазири этиб тайинлангани билан табриклаган эди.
Аввалроқ, 12 март куни Қирғизистон президенти Садир Жапаров Тошкентга ташрифи доирасида Ўзбекистон президенти Шавкат Мирзиёев ҳамроҳлигида Тошкентдаги «Texnopark» мажмуаси фаолияти билан танишган эди. Орадан бир неча кун ўтиб «Азаттик» радиосига берган интервьюсида Ўзбекистон бир неча ўн йилга илгарилаб кетганини тан олганди.
«Куни кеча Ўзбекистонга борганда кўп нарсани сездим. Ҳатто роса уялдим ҳам. (Биз қирғизлар) 30 йилдан бери бир-биримиз билан сиёсатда келишмай, митинглар ўтказиб, фақат этик тозалайдиган чўтка ишлаб чиқара олибмиз. Фабрика-завод қурмабмиз. Ўзбекистон биздан 40—50 йил олдинга ўтиб кетибди, десам янглишмайман. Майда шурупдан тортиб, самолёт чиқаришгача етиб боришибди», — деганди у.
Президент Садир Жапаровнинг ўша ташрифи вақтида икки давлат раҳбарлари Ўзбекистон–Қирғизистон чегарасининг қолган қисмларини ҳам делимитация қилиш мақсадида Ҳукуматлараро комиссияга музокараларни фаоллаштириш бўйича кўрсатма берган эди. 22 март куни Қирғизистон ҳукуматининг ушбу масала бўйича делегацияси раҳбари — Қирғизистон Миллий хавфсизлик давлат қўмитаси раиси Қамчибек Ташиев Тошкентга етиб келган, музокаралар бошланган.
Изоҳ (0)