Туркманистон пойтахтида «Тошкент» номли истироҳат боғи қурилиши ҳақида хабар берилган эди. 17 март куни амалий ташриф билан Туркманистон пойтахти Ашхободда бўлган Тошкент шаҳар ҳокими Жаҳонгир Ортиқхўжаев боғининг дастлабки лойиҳаси билан танишди.
Тошкент шаҳар ҳокимлиги матбуот хизматининг маълум қилишича, Ашхобод шаҳри ҳокими Язтаган Гилиджов ва Жаҳонгир Ортиқхўжаев ушбу боғнинг дастлабки лойиҳасини кўриб чиқиб, уни такомиллаштириш бўйича фикр алмашди.
Язтаган Гилиджовнинг сўзларига кўра, «Тошкент» боғини Ашхободнинг тарихий марказида, Махтумқули кўчасидаги 3 гектар ҳудудда барпо этиш мўлжалланган. 2017 йилнинг апрелида Тошкентда Туркманистон ва Ўзбекистон ўртасидаги яхши қўшничилик ва дўстлик алоқаларининг рамзи сифатида «Ашхобод сайилгоҳи» очилган эди.
Учрашув давомида икки томонлама алоқаларни ривожлантириш ва мустаҳкамлаш масалалари ҳам муҳокама этилган.
Жаҳонгир Ортиқхўжаев, шунингдек, 23 март куни Тожикистон пойтахти Душанбе шаҳрида бўлиб, Тожикистон Мажлиси Олий Мажлиси раиси, Душанбе шаҳри раиси Рустами Имомали билан учрашди.
Ҳокимлик хабарида айтилишича, учрашувдан сўнг Тошкент шаҳар ҳокимлиги бошчилигидаги делегацияси ичимликлар ишлаб чиқарувчи, гранит тош ва мармарни қайта ишловчи корхоналар фаолияти билан танишди, Душанбедаги кўп қаватли уйларнинг қурилишини кўздан кечирди.
Ташриф давомида томонлар маҳаллий иқлим шароитига мослаштирилган уй-жойлар режаси ҳамда Ўзбекистондан қурилиш материаллари етказиб бериш борасида фикр алмашди.
Душанбе шаҳар мериясида бўлиб ўтган учрашувда Grand Road Tashkent МЧЖ ҚК бош директори Аҳмад Сайдалиев Душанбе шаҳар раисининг транспорт ва йўл қурилиши бўйича ўринбосари Саидзода Фирдавс ва «Душанбе шаҳрининг йўллар ва кўприкларни қуриш, реконструкция қилиш ва капитал таъмирлаш бошқармаси» давлат муассасаси раҳбари Раҳимзода Муҳаммадюсуф билан учрашган.
Ўзаро мулоқот давомида Тожикистон томони ер усти метросини қуриш бўйича Ўзбекистон тажрибасини ўрганишга қизиқиш билдирган.
Изоҳ (0)