Ташқи меҳнат миграцияси агентлиги Қозоғистонда паспорт ва ойлик маошлари берилмаётган ўзбекистонлик меҳнат мигрантларининг муаммоларини ўрганишни бошлади. Бу ҳақда агентлик матбуот хизмати хабар берди.
Маълум қилинишича, Қозоғистоннинг Нур-Султон, Олмаота ва Чимкент шаҳарларида вақтинчалик меҳнат фаолиятини амалга ошираётган Ўзбекистон фуқароларининг паспорт ва ойлик маошлари иш берувчилар томонидан берилмаётгани ҳақида кўплаб мурожаатлар келиб тушган.
Хабарга кўра, мазкур мурожаатлар юзасидан Ўзбекистоннинг Қозоғистондаги элчихонаси, Атташе ҳамда Қозоғистон ички ишлар органлари ходимлари билан ҳамкорликда воқеа жойига чиқилиб, фуқароларнинг қонуний ҳуқуқ ва манфаатлари ҳимоя қилинмоқда.
«Турли муаммоларга дуч келаётган меҳнат мигрантларидан келиб тушган мурожаатлар ижроси қисқа муддатда ижобий ҳал этилмоқда», — дейилади хабарда.
Аввалроқ Шавкат Мирзиёевнинг 25 февралдаги қарори билан Ўзбекистон ва Қозоғистон ҳукуматлари ўртасида меҳнат фаолияти ва Қозоғистонда Ўзбекистон фуқароси бўлган меҳнат муҳожирлари ва Ўзбекистонда Қозоғистон фуқароси бўлган меҳнат муҳожирлари ҳуқуқларини ҳимоя қилиш тўғрисидаги битим тасдиқлангани ҳақида хабар берилган эди.
Изоҳ (0)