Turkmaniston poytaxtida “Toshkent” nomli istirohat bog‘i qurilishi haqida xabar berilgan edi. 17-mart kuni amaliy tashrif bilan Turkmaniston poytaxti Ashxobodda bo‘lgan Toshkent shahar hokimi Jahongir Ortiqxo‘jayev bog‘ining dastlabki loyihasi bilan tanishdi.
Toshkent shahar hokimligi matbuot xizmatining ma’lum qilishicha, Ashxobod shahri hokimi Yaztagan Gilidjov va Jahongir Ortiqxo‘jayev ushbu bog‘ning dastlabki loyihasini ko‘rib chiqib, uni takomillashtirish bo‘yicha fikr almashdi.
Yaztagan Gilidjovning so‘zlariga ko‘ra, “Toshkent” bog‘ini Ashxobodning tarixiy markazida, Maxtumquli ko‘chasidagi 3 gektar hududda barpo etish mo‘ljallangan. 2017-yilning aprelida Toshkentda Turkmaniston va O‘zbekiston o‘rtasidagi yaxshi qo‘shnichilik va do‘stlik aloqalarining ramzi sifatida “Ashxobod sayilgohi” ochilgan edi.
Uchrashuv davomida ikki tomonlama aloqalarni rivojlantirish va mustahkamlash masalalari ham muhokama etilgan.
Jahongir Ortiqxo‘jayev, shuningdek, 23-mart kuni Tojikiston poytaxti Dushanbe shahrida bo‘lib, Tojikiston Majlisi Oliy Majlisi raisi, Dushanbe shahri raisi Rustami Imomali bilan uchrashdi.
Hokimlik xabarida aytilishicha, uchrashuvdan so‘ng Toshkent shahar hokimligi boshchiligidagi delegatsiyasi ichimliklar ishlab chiqaruvchi, granit tosh va marmarni qayta ishlovchi korxonalar faoliyati bilan tanishdi, Dushanbedagi ko‘p qavatli uylarning qurilishini ko‘zdan kechirdi.
Tashrif davomida tomonlar mahalliy iqlim sharoitiga moslashtirilgan uy-joylar rejasi hamda O‘zbekistondan qurilish materiallari yetkazib berish borasida fikr almashdi.
Dushanbe shahar meriyasida bo‘lib o‘tgan uchrashuvda Grand Road Tashkent MChJ QK bosh direktori Ahmad Saydaliyev Dushanbe shahar raisining transport va yo‘l qurilishi bo‘yicha o‘rinbosari Saidzoda Firdavs va “Dushanbe shahrining yo‘llar va ko‘priklarni qurish, rekonstruksiya qilish va kapital ta’mirlash boshqarmasi” davlat muassasasi rahbari Rahimzoda Muhammadyusuf bilan uchrashgan.
O‘zaro muloqot davomida Tojikiston tomoni yer usti metrosini qurish bo‘yicha O‘zbekiston tajribasini o‘rganishga qiziqish bildirgan.
Izoh (0)