Қозоғистон пойтахти Нур-Султонда қор бўрони содир бўлди. Кучли қор ва қаттиқ шамол туфайли атрофни кўриб бўлмай қолган. Синоптикларнинг хабар беришича, шамол тезлиги сониясига 20 метрни ташкил қилган. Қозоғистон гидрометеорология маркази шаҳар аҳолисини кўчаларни қалин муз қоплаши ҳақида огоҳлантирган. Ҳаво ҳарорати минус 7 даража бўлишига қарамай, минус 13 сингари совуқ сезилмоқда, деб ёзади Tengrinews.

Фото: Tengrinews

Фото: Tengrinews

Фото: Tengrinews

Акмола вилояти Фавқулодда вазиятлар бошқармасининг хабар беришича, об-ҳаво шароити ёмонлашгани — кўриш имконияти чеклангани, шамол ва кучли қор ёғиши сабабли республика аҳамиятидаги йўл участкаларида барча турдаги транспорт ҳаракати тўхтатилган:

  • Нур-Султон—Кабанбай Ботир—Киевка—Темиртов, Кабанбай ботир қишлоғидан Қарағанда вилояти чегарасигача, 32—51 километр;
  • Екатеринбург—Олмаота, Нур-Султондан Темиртовгача, 1291—1426 километр.

«Қарағанда—Нур-Султон автомагистралида кучли қор бўрони транспорт ҳаракатини чеклаб қўйган. Ҳайдовчилар уч соатдан бери қордаги тутқунликдан чиқишга ҳаракат қилмоқда», — дейилади хабарда.

Нашрнинг таъкидлашича, уларнинг баъзилари билан боғланишга муваффақ бўлинган. Уларнинг айтишича, йўлда кўриниш даражаси деярли нолга тенг. Шунингдек, йўлларда баъзи бахтсиз ҳодисалар ҳам юз берган, жумладан, пойтахтдан 70 километр узоқликда енгил автомобиль ва «Газель» тўқнашиб, бир аёл жароҳат олган. Магистрал йўлда қолиб кетган ҳайдовчилар қутқарувчилардан ёрдам сўрамоқда.

Фото: Tengrinews

Нур-Султон шаҳар ҳокимлиги расмий сайтида айтилишича, ўтган кун давомида пойтахтдан 31 минг куб метр қор тозаланган.

Фото: astana.gov.кз

22 мартдан 23 мартга ўтар кечаси шаҳар йўллари, пиёдалар йўлаклари, майдонлар ва бошқа жамоат жойларини санитария тозалаш ишларига 450 дан ортиқ ихтисослаштирилган техника ва 100 га яқин йўл тозаловчи ишчилар жалб қилинди.

23 март куни эса қор тозалаш ишларига 960 та махсус техника ва 1700 дан ортиқ ишчилар сафарбар қилинган.

Шуни таъкидлаш керакки, Нур-Султон шаҳрида қор тозалаш ишлари икки сменали режимда кечқурун ва тунда жадаллик билан олиб борилади, шунингдек, транспорт йўналишлари созланади.

Қоидага кўра, йўлларда тирбандлик ҳосил бўлмаслиги учун дастлаб транспорт серқатнов бўлган йўналишлар тозаланади. Шундан кейин, ўрта зичликдаги қисм — майдонлар, чекка жойлар, пиёдалар йўлаклари ва бошқалар қордан тозаланади.

Йиғилган қорлар пойтахтнинг барча туманларида мавжуд ўн битта чиқиндихонага олиб кетилади. Полигонларда назорат учун фото ва видеокамералар ўрнатилган.