Термизда Ўзбекистон ва Туркия ҳарбийлари ҳамкорлигида махсус-тактик ўқув жараёнлари бошланди. Бу ҳақда Мудофаа вазирлиги матбуот хизмати хабар берди.
Қайд этилишича, 22 март куни Жануби-ғарбий махсус ҳарбий округ Жанубий оператив қўмондонлиги Термиз дала-ўқув майдонида Ўзбекистон ва Туркия мудофаа вазирларининг икки томонлама ҳарбий ҳамкорлик режасига асосан мазкур мамлакатлар Қуролли Кучларининг махсус бўлинмалари билан ҳамкорликдаги махсус-тактик ўқувининг тантанали очилиш маросими бўлиб ўтди.
Тадбирда Ўзбекистон Мудофаа вазирлиги бошқарма бошлиғи полковник Лазиз Усмонов, Жанубий оператив қўмондонлиги бошлиғи полковник Пўлат Сативалдиев ва Туркия махсус операция кучлари бригадаси командирининг ўринбосари полковник Рушту Тўреди ва икки давлат ҳарбий хизматчилари иштирок этди.
Дала-ўқув майдонида ҳарбий хизматчилар тажриба алмашиш учун 15 километр мажмуавий махсус-тактик йўлагидан ўтиш, жанговар иккилик, учлик ва тўртлик таркибида яқин жанг элементлари бўйича кўргазмали амалий махсус ўқ отиш ва қийин шароитларда яшовчанлик ҳолатлари бўйича амалий машғулотларга жалб этилган.
Шунингдек, полигонда иштирокчилар махсус-тактик ўқуви саволлари бўйича машғулотлар олиб борган ҳамда ўзбек ва турк ҳарбийлари ўртасида спорт мусобақалари ўтказилган.
Вазирликнинг билдиришича, ҳамкорликдаги махсус-тактик ўқув машғулотлари 27 мартга қадар давом этади.
Эслатиб ўтамиз, 17 март куни Шавкат Мирзиёев «Халқаро шартномаларни тасдиқлаш тўғрисида»ги қарорни имзолаганди. Қарор билан 2020 йил 27 октябрда Тошкент шаҳрида имзоланган Ўзбекистон ва Туркия ҳукуматлари ўртасида ҳарбий-молиявий ҳамкорлик тўғрисидаги битим ҳамда молиявий кўмакни амалга ошириш тўғрисидаги баённома тасдиқланди.
Ҳар икки ҳужжат 2020 йил 27 октябрда Туркия миллий мудофаа вазири Ҳулуси Акарнинг Тошкентга ташрифи чоғида имзоланган.
Изоҳ (0)