Наманган вилоятининг Чуст тумани «Ёрқишлоқ» маҳалласида Наврўз байрами кунлари оммавий тухум уриштириш мусобақалари бўлиб ўтди. Бу ҳақда «Дарё» мухбири Азизбек Абдувалиев хабар бермоқда.
Мазкур ўйин қарийб бир асрдан бери авлоддан авлодга ўтиб келади. Уни якка тартибда ҳам, жамоа бўлиб ҳам ўйнаш мумкин.
«Тухумлар жанги»дан аввал уларга қизил, кўк ёки бошқа ранг бериб, байрамона безаш мумкин. Улар дарров синиб қолмаслиги усулларини эса ҳар ким ўзича талқин қилади: кимдир тузли сувда обдон қайнатиш зарур деса, яна кимдир хонаки тухумлардан фойдаланишни маъқул деб билади.
Қатнашувчиларнинг айтишича, бу ўйин қайсидир маънода даромад манбаи ҳам. Чунки пиширилган тухум бозорда ҳа деганда харидор эътиборига тушмаслиги мумкин. Мусобақа баҳонасида эса дарров сотилиб кетади.
Ўйинда ютқизган томон тухумлар пулини тўлаб беради. Бу йил бир дона пиширилган тухум баҳоси 1,5-2 минг сўмга тенг бўлди.
Ёрқишлоқда ўтказилган навбатдаги «тухумлар жанги»да иштирок этиш ва томоша қилиш учун Чуст туманининг барча маҳаллаларидан меҳмонлар келди. Уларнинг сони 1000 нафарга яқин бўлгани айтилмоқда.
Изоҳ (0)