Тошкентда хориждан маҳсулотлар олиб келиб беришини ваъда қилиб, фуқародан 805 минг АҚШ долларидан ортиқ пул олган шахс қўлга олинди, дея хабар бермоқда Тергов департаменти.
Маълум қилинишича, 2020 йилнинг январь ойида 28 ёшли А.А. ўзганинг мулкини фирибгарлик йўли билан қўлга киритиш мақсадида Мирзо Улуғбек тумани Марказ-1 даҳаси ҳудудида 24 ёшли Д.И.га тадбиркорлик фаолияти билан шуғулланишини айтган.
У Д.И.га Россиядан арзон нархда ёғоч ҳамда Хитойдан писта маҳсулотлари олиб келиб, сотиб, катта миқдорда даромад беришини ваъда қилиб, шу йўл орқали унинг ишончига кирган.
А.А. январь ойидан сентябрь ойига қадар бўлган вақт оралиғида давомида Д.И.дан бўлиб-бўлиб жами 805 320 АҚШ доллар пул маблағларини алдов йўли билан қўлга киритиб, ўз эҳтиёжлари учун ишлатиб юборган.
Мазкур ҳолат юзасидан ИИВ ҳузуридаги Тергов департаменти томонидан А.А.га нисбатан Жиноят кодексининг 168-моддаси 4-қисми «а» банди (жуда кўп миқдорда фирибгарлик йўли билан ўзганинг мулкини ўзлаштириш) билан жиноят иши қўзғатилиб, гумон қилинувчи тариқасида жалб қилинган.
Ҳозирда тергов ҳаракатлари олиб борилмоқда.
Бундан аввал Навоийда тадбиркорга тегишли ерни 150 минг долларга сотишга уринган шахс ушлангани, Қаршида ўзини ҳокимлик ходими деб таништирган шахс имтиёзли уй олмоқчи бўлган икки аёлдан жами 1000 доллар «ухлатгани» аниқлангани ҳамда Бухоро тумани ҳокимлиги захирасидаги ерни 23,5 минг долларга сотмоқчи бўлган шахс ушлангани ҳақида хабар берилганди.
Изоҳ (0)