Танзания президенти 61 ёшли Жон Магуфули вафот этди. Бу ҳақда мамлакат вице-президенти Самия Сулуху Хасан маълум қилди, деб ёзади «РБК».
Аввалроқ Танзания мухолифати раҳбари Тунду Лиссу президентнинг коронавирус билан касаллангани ва қўшни давлат Кенияда касалхонага ётқизилгани ҳақида айтганди.
Аммо президент ўлимининг расмий сабаби сифатида юрак билан боғлиқ муаммолари келтирилди. «Президент Жон Магуфули 10 йилдан бери азоб чекиб келаётган юрак хасталиги туфайли вафот этди», — дейилади мамлакат вице-президенти Самия Сулуханинг баёнотида.
Магуфули мамлакатда чекловлар жорий қилишдан бош тортган ва тиббий ниқоб тақмаганларни олқишлаган. Инфекция тарқалишига қарши курашишнинг илмий усуллари ўрнига, президент танзанияликлардан COVID-19 устидан ғалаба учун ибодат қилишни сўраган ва «коронавирус — иблис» деб таъкидлаган.
Танзания давлатида 2020 йил баҳорида 509 нафар кишида коронавирус касаллиги қайд этилган, 21 киши касалликдан вафот этган. Бироқ 2020 йил июнь ойининг бошларида Жон Магуфули мамлакатда касаллик чекинганини ва Танзания яна сайёҳларни қабул қилишга тайёрлигини расман эълон қилган. Коронавирусга қарши намоз билан бирга, профилактика сифатида у доривор ўтлар, буғ муолажалари, занжабил ва пиёз аралашмасидан фойдаланишни таклиф қилган. Ўшандан бери мамлакатда коронавирус билан касалланиш статистикаси олиб борилмаган.
Маълум қилинишича, Европа Иттифоқи бирдамлик жамғармаси Танзанияга коронавирус пандемияси ва унинг иқтисодий оқибатларига қарши курашиш учун маблағ ажратган. Ушбу маблағлар шахсий ҳимоя воситаларини сотиб олишга, вакциналар, дори-дармонларни ишлаб чиқаришга, аҳолини эмлаш ва коронавирус тарқалишига қарши қаратилган бошқа тадбирларга сарфланиши керак эди.
Бироқ эпидемия билан курашиш учун пул олганидан сўнг, Танзания ҳукумати мамлакатни коронавирусдан холи деб эълон қилган.
Январь ойи охирида Магуфули танзанияликлардан «тажриба қуёнчаси сифатида фойдаланилишини» истамагани учун аҳолининг эмланмаслигини эълон қилди. «Агар оқ танлилар фойдали вакцина яратишга қодир бўлганда эди, улар ОИТС, саратон ва силга қарши вакциналарни ҳам топган бўларди», — дея вакциналарни хавфли деб атаган ва уларнинг иш беришига шубҳа билан қараган.
Февраль ойининг охиридан бошлаб Магуфули омма олдида кўринмай қолган. Мамлакат расмийлари мухолифатнинг президент коронавирус туфайли оғир касал бўлиб қолгани ҳақидаги даъволарига оид ҳеч қандай маълумот тарқатмаган. Танзания оппозициясининг етакчиси Лиссу 15 март куни ўз манбаларига асосланиб, президент COVID-19 фонида сунъий нафас олдириш аппаратига уланганини айтган.
Маълумот учун, Магуфули 1959 йил 29 октябрда республиканинг шимоли-ғарбий қисмида туғилган. Математика ва кимё бўйича педагогик маълумотни эгаллаган Магуфули нафақат маҳаллий университетларда, балки Буюк Британиянинг Салфорд университетида ҳам ўқиган ва у ерда 1994 йилда кимё бўйича магистр даражасини олган.
1995 йилда Магуфули биринчи бўлиб ўзи туғилган ҳудуд парламентига сайланди, шу билан бирга сиёсатчи қурилиш вазирининг ўринбосари этиб тайинланди. Кейинчалик у меҳнат вазири, қурилиш вазири, чорвачилик ва балиқчиликни ривожлантириш вазири лавозимларида фаолият юритган. Магуфули 2015 йилда Танзаниянинг бешинчи президенти этиб сайланган эди.
Аввалроқ Танзанияда мамлакатдаги коронавирус билан боғлиқ вазиятни муҳокама қилиш тақиқлаб қўйилгани ҳамда эчки ва папайяда ҳам коронавирус аниқлангандан сўнг ушбу мамлакат Соғлиқни сақлаш миллий лабораторияси раҳбари ишдан бўшатилгани ҳақида хабар берилганди.
Изоҳ (0)