Наврўз байрами арафасида Андижон—Хонобод шаҳарлари ўртасида йўловчи поезд қатнови йўлга қўйилади

Наврўз байрами арафасида синов тариқасида Андижон ва Хонобод шаҳарлари ўртасида йўловчи поезд қатнови йўлга қўйилади. Бу ҳақда «Дарё» мухбири Умиджон Мамарасулов хабар берди.

Андижон вилоят транспорт бошқармаси ахборот хизматининг аниқлик киритишича, аҳолининг темир йўл транспортига бўлган эҳтиёжини қондириш, уларга қулайликлар яратиш мақсадида бошланган Андижон—Савай—Хонобод темир йўл участкаларидаги барча қурилиш ишлари якунига етиб қолган. Шу муносабат билан Наврўз байрами арафасида Андижон—Хонобод темир йўл линиясида синов тариқасида йўловчи поезд қатнови йўлга қўйилади.

Таъкидланишича, мазкур бунёдкорликнинг бош лойиҳаси «Тоштемирйўллойиҳа» масъулияти чекланган жамияти мутахассислари томонидан ишлаб чиқилган. Унга кўра, бу ерда 520 минг куб метр тупроқ ишлари бажарилган. Шунингдек, 45 та сунъий иншоот (1 та темир йўл кўприги) қурилган. Мавжуд 53,2 километр темир йўллар таъмирланиб, 10,2 километр масофада янги пўлат излар ётқизилган. Шунингдек, жами 7 та автомобиль ва темир йўл кесишмасини бунёд этилган

Қайд этилишича, Президент Шавкат Мирзиёев 2020 йил 21—22 май кунлари Андижон вилоятига ташрифи давомида Транспорт вазирлиги ҳамда «Ўзбекистон темир йўллари» АЖга Андижон—Савай—Хонобод темир йўл участкасини модернизация қилиш ҳамда йўналишда йўловчи поезд рейсларини йўлга қўйиш бўйича вазифалар берган.