Тошкентнинг Чилонзор туманидаги «Қатортол» маҳалласида жойлашган уйлар ўрасидаги ҳудудда хусусий боғча қурилиши тадбиркор ва аҳоли ўртасида юзага келган можаро сабаб вақтинча тўхтатилди. Бу ҳақда туман ҳокимлиги матбуот хизмати хабар берди.

Маълум бўлишича, қурилиш бўйича Чилонзор тумани ҳокимининг тегишли қарори қабул қилинган. Бироқ мазкур қарорга аҳолининг эътирози ҳисобга олиниб, ажратилган ер майдони бироз ўзгартирилган ҳолда янгидан қарор қабул қилинган.

Унга кўра, Чилонзор тумани, 9-мавзе 17, 19 ва 20-уйлар оралиғида умумий майдони 0,15 гектар ер майдони «Карьера образования» МЧЖга хусусий болалар боғчасини янгидан ташкил этиш учун ажратиб берилган.

Аниқланишича, ушбу ҳужжатлар тўпланган пайтда фаолият олиб борган маҳалла раиси ва ширкат раҳбарлари аҳоли билан маслаҳатлашмаган. МФЙ раиси томонидан баённома тузилган. Айни пайтдаги маҳалла раиси Парда Эргашевнинг сўзларига кўра, аҳоли ҳудуддаги яшил майдонни сақлаб қолиш ниятида. Шу боис, маҳалла аҳолиси ўз норозилигини билдириб, ушбу низоли вазиятни суд орқали ҳал қилишга қарор қилган.

Бугунги кунда аҳоли томонидан судга ариза топширилган ва иккала томон суд қарорини кутишга келишган. Шу сабабли ҳозирда хусусий МТТнинг қурилиш жараёнлари суд қарори чиқишига қадар тўхтатилган.

Аввалроқ Тошкентда бир қатор кўп қаватли турар жой бинолари ноқонуний қурилаётгани аниқланса-да, қурилиш ишлари тўхтатилмагани маълум қилингани, Нукусда камчилиги аниқланган кўп қаватли уйнинг девори бузиб ташлангани ҳамда Фарғонада кўп қаватли турар жойлар ўртасида барча қурилишлар тўхтатилиб, болалар ва спорт майдончалари қайта тикланиши ҳақида хабар берилганди.

Эслатиб ўтамиз, 2020 йилда Чилонзор туманидаги энг серқатнов кўчалардан бири ҳисобланган Қатортол кўчасида 2560 квадрат метр асфальт ётқизилган, Чўпонота кўчасининг 8100 квадрат метр майдони ҳам янгидан асфальт қилинган, Қатортол кўчаси намунавий кўчага айлантирилиши белгиланган эди.