Номаълум шахслар британиялик кўча рассоми Бэнксининг деворга чизган граффитисининг бир қисмини ўзгартириб кетди. Улар бир вақтлар ёзувчи Оскар Уайльд жазони ўтаган Редингдаги қамоқхона деворига чизилган асарни ўзгартирди. Бўяб кетилган картина остида граффити устасининг асосий рақиби бўлган рассомнинг исми-шарифи ёзиб кетилган. Бу ҳақда Independent хабар берди.

Фото: Reuters

Бэнксининг граффитисида қамоқхона деворидан пастга чойшабни арқон қилиб, осилган ҳолда тушиб кетаётган маҳбус ва а рқоннинг учига ёзув машинкаси ҳам боғлаб қўйилгани чизилганди.

Ёзувчи Оскар Уайльд тасвирланган Бэнксининг граффитиси

Фото: Glamour

Номаълум гуруҳ ёзув машинкасини қизил бўёқ билан бўяган ва унинг остига катта ҳарфлар билан Team Robbo («Роббонинг жамоаси») деган жумлани ёзиб қолдирган.

Жон Робертсон Қирол Роббо тахаллуси билан танилган британиялик андерграунд рассоми ҳисобланади. Унинг Бэнкси билан рақобати ҳақида Graffiti Wars («Граффити уруши») номли телевизион ҳужжатли фильм ишланган. Маълумотларга кўра Робертсон 2014 йилда вафот этган.

Аввал Ноттингемда Бэнкси граффитиси композициясининг бир қисми бўлган велосипед ўғирлаб кетилгани ҳақида хабар берилганди.

Шунингдек, Бэнкси Буюк Британия соғлиқни сақлаш миллий хизмати учун 3,5 миллион евродан кўпроқ хайрия маблағи йиғиб бериш мақсадида Саутгемтоннинг марказий касалхонасида COVID-19 пандемиясининг биринчи тўлқини вақтида пайдо бўлган граффитини аукционга қўйиши, Нью-Йоркда рассомнинг асари 95 минг долларга сотиб олиниб, криптовалютага айлантириш мақсадида ёқиб юборилгани, Англияда аксираётган кампир акс этган Бэнксининг янги граффитиси чизилгани хусусида ҳам хабарлар берилган.