Noma’lum shaxslar britaniyalik ko‘cha rassomi Benksining devorga chizgan graffitisining bir qismini o‘zgartirib ketdi. Ular bir vaqtlar yozuvchi Oskar Uayld jazoni o‘tagan Redingdagi qamoqxona devoriga chizilgan asarni o‘zgartirdi. Bo‘yab ketilgan kartina ostida graffiti ustasining asosiy raqibi bo‘lgan rassomning ismi-sharifi yozib ketilgan. Bu haqda Independent xabar berdi.
Benksining graffitisida qamoqxona devoridan pastga choyshabni arqon qilib, osilgan holda tushib ketayotgan mahbus tasvirlangan. Arqonning uchiga yozuv mashinkasi ham bog‘lab qo‘yilgani chizilgandi.
Noma’lum guruh yozuv mashinkasini qizil bo‘yoq bilan bo‘yagan va uning ostiga katta harflar bilan Team Robbo (“Robboning jamoasi”) degan jumlani yozib qoldirgan.
Jon Robertson Qirol Robbo taxallusi bilan tanilgan britaniyalik andergraund rassomi hisoblanadi. Uning Benksi bilan raqobati haqida Graffiti Wars (“Graffiti urushi”) nomli televizion hujjatli film ishlangan. Ma’lumotlarga ko‘ra Robertson 2014-yilda vafot etgan.
Avval Nottingemda Benksi graffitisi kompozitsiyasining bir qismi bo‘lgan velosiped o‘g‘irlab ketilgani haqida xabar berilgandi.
Shuningdek, Benksi Buyuk Britaniya sog‘liqni saqlash milliy xizmati uchun 3,5 million yevrodan ko‘proq xayriya mablag‘i yig‘ib berish maqsadida Sautgemtonning markaziy kasalxonasida COVID-19 pandemiyasining birinchi to‘lqini vaqtida paydo bo‘lgan graffitini auksionga qo‘yishi, Nyu-Yorkda rassomning asari 95 ming dollarga sotib olinib, kriptovalyutaga aylantirish maqsadida yoqib yuborilgani, Angliyada aksirayotgan kampir aks etgan Benksining yangi graffitisi chizilgani xususida ham xabarlar berilgan.
Izoh (0)