Уммоннинг Телекоммуникациялар назорати бошқармаси (ТRА) Clubhouse ижтимоий тармоғини блоклади. Бу ҳақда WАF агентлигига таяниб «Коммерсантъ» хабар берди.
Блокланишнинг сабаби ижтимоий тармоқнинг ТRА рўйхатидан ўтмаганлиги бўлди.
«Clubhouse дастури блокланди, чунки интернет орқали аудио ва видеоалоқа учун фойдаланиладиган алоқа дастурларининг барчаси бошқармадан лицензия олиши керак. Уммонда рўйхатдан ўтмагани учун дастур фаолияти тўхтатилди», — деб хабар берилди ТRА мижозлар хизматида.
Уммонда алоқа учун шифрланган каналлар (VoIP) ёрдамида ишлайдиган дастурлардан фойдаланиш тақиқланган. Лекин коронавирус пандемияси туфайли давлат ташкилотлари ва мактаблар фаолиятини таъминлаш учун Skype, Google Meet ва Zoom каби дастурларга нисбатан чекловлар сусайтирилди.
Clubhouse 2020 йилнинг март ойида ишга туширилган, лекин фойдаланувчилар сони 2021 йилнинг бошида сезиларли даражада кўпайди. Январь ойининг охирида дастур бир ҳафта ичида 2 миллион фаол фойдаланувчига эга бўлди. Февраль ойи охирида эса 10 миллиондан ошди. Ҳозир дастур 1 миллиард долларга баҳоланмоқда.
Аввалроқ Покистон суд қароридан кейин TikTok ижтимоий тармоғини блоклаши ҳақида хабар берилган эди. Пешавор шаҳри юқори судининг таъкидлашича, суд тармоқнинг ахлоқсиз контент тарқатаётгани ҳақидаги аризачининг далиллари билан танишиб, дастурни блоклаш тўғрисида буйруқ берган. TikTok’нинг Покистондаги вакилининг айтишича, у суд қарори ҳақида эшитган ва компания кейинроқ бу масала юзасидан изоҳ беради.
Изоҳ (0)