Armaniston bilan mojaro avj olib borayotgan bir paytda Ozarbayjon hukumati ijtimoiy tarmoq va messenjerlarni bloklab qo‘ydi. Bu haqda butun dunyo bo‘ylab internet mavjudligini kuzatuvchi Netblocks tashkilotiga tayanib, Meduza xabar qildi.
Foto: “Time.kz”
Netblocks ma’lumotlariga ko‘ra, Facebook, Twitter, Instagram, LinkedIn, TikTok ijtimoiy tarmoqlari, WhatsApp, Facebook Messenger, Skype va Zoom messenjerlari, YouTube videoxostingi bloklandi.
Ozarbayjon Transport, aloqa va yuqori texnologiyalar vazirligi 27-sentabr kuni Armaniston tomonidan keng miqyosdagi provokatsiyalarning oldini olish maqsadida mamlakatda internetni cheklash to‘g‘risida ogohlantirgandi. Agentlik qaysi xizmatlar bloklanishi haqida aniq ma’lumot bermagan.
Rossiyaning Internetni himoya qilish jamiyati notijorat tashkiloti direktori Mixail Klimaryev 28-sentabr kuni “Novaya gazeta”ga Ozarbayjonda ijtimoiy tarmoqlarga VPN orqali kirish imkoniyati saqlanib qolayotganini, ammo mamlakatda bunday xizmatlardan kam sonli odamlar foydalanayotganini ma’lum qildi.
“Bundan tashqari, barcha tarmoqlar bloklanmagan, masalan, “VKontakte” o‘z ishini davom ettirmoqda”, deb qo‘shimcha qildi Klimaryev.
Eslatib o‘tamiz, 27-sentabr kuni tongda Tog‘li Qorabog‘da Armaniston va Ozarbayjon o‘rtasida harbiy ziddiyat keskinlashdi. Ikki mamlakatda ham harbiy holat e’lon qilindi.
Avvalroq O‘zbekiston tashqi ishlar vazirligi vaziyat yuzasidan o‘z munosabatini bildirib o‘tdi. Turkiya va Afg‘oniston bu mojaroda Ozarbayjonni qo‘llab-quvvatlashni bildirdi. ShHT bosh kotibi Vladimir Norov ziddiyatni tinch yo‘l bilan hal etishga umid qildi.
Armaniston Jahon hamjamiyatidan Turkiyani bu ishlarga aralashishiga yo‘l qo‘ymaslikni so‘radi. Rasmiy Yerevan o‘z navbatida Turkiyani Suriyadagi jangarilarni Tog‘li Qorabog‘ga yo‘naltirishda ayblamoqda. Qayd etilishicha, chegaraga 4 mingdan ortiq jangari yig‘ilgan.
