Самарқанд вилоятининг Булунғур туманида фуқарони «аёллар дафтари»га киритиш учун пора талаб қилган маҳалла раисига жиноят иши қўзғатилди, деб хабар бермоқда вилоят прокуратураси матбуот хизмати.
Маълум бўлишича, фуқаро Д.М. ИИБга ариза билан мурожаат қилиб, ундан 500 доллар пора талаб қилган «Ўроқли» МФЙ раисига қонуний чора кўришни сўраган. Ушбу маҳалла раиси бу пул эвазига уни кам таъминланган оилалар учун қурилаётган уйларга эҳтиёжманд фуқаро сифатида маҳалла «аёллар дафтари» («темир дафтар»)га рўйхатга олиш ва тегишли тавсиянома беришни ҳамда туман ҳокимлигида ишловчи мансабдор танишлари орқали уй олиб беришни ваъда қилган.
Ариза юзасидан ДХХ Тойлоқ туман бўлими ва Бош прокуратура ҳузуридаги Иқтисодий жиноятларга қарши курашиш департаменти вилоят бошқармаси ходимлари ҳамкорлигида ўтказилган тезкор тадбир давомида маҳалла раиси аёлдан 500 долларни Булунғур туман ИИБнинг маъмурий биноси олдида олган вақтида ашёвий далиллар билан ушланган.
Ҳолат юзасидан Жиноят кодексининг 168-моддаси 3-қисми «в» банди (хизмат мавқейидан фойдаланиб, фирибгарлик содир этиш) ва 28-211-моддаси (пора бериш) 1-қисми билан жиноят иши қўзғатилиб, вилоят прокуратураси уюшган жиноятчилик ва коррупцияга қарши курашиш бўлими томонидан дастлабки тергов ҳаракатлари олиб борилмоқда.
Аввалроқ Тошкентда маҳалла раиси ва бандлик инспектори ишсизларга ажратилган 36 миллион сўмни талон-торож қилгани, Бекободда маҳалла раиси нафақага муҳтож бўлмаган фуқароларга 100 миллион сўмдан ортиқ пул тайинлагани, Навоийда маҳалла раиси икки нафар эҳтиёжманд фуқародан 28,5 миллион сўмни фирибгарлик орқали қўлга киритгани аниқлангани ҳақида хабар берилган эди.
Изоҳ (0)