Бухоролик йигитга Mercedes’ини совға қилган рэпер Моргенштерн Россиядаги банк директори этиб тайинланди

Россиядаги энг йирик хусусий банклардан бири ҳисобланувчи «Альфа-банк» рэпер Моргенштернни ёшлар билан ишлаш бўйича директор лавозимига тайинланди. Мазкур лавозим қўшиқчи учун махсус яратилган, деб хабар беради Esquire.

«Алишер жиддий ишлаш ниятида ва унинг учун қизармаслигимизни ваъда берди. Моргенштерн барча қатори офисга келади, йиғилишларда қатнашади ва натижалар бўйича ҳисобот беради», — дейди «Альфа-банк»нинг маркетинг ва коммуникациялар бўйича директори Алексей Гиязов. Рэпер камида 100 минг нафар янги мижозни жалб этиши керак бўлади.

Банк вакилларининг маълум қилишича, улар Моргенштернни «ахлоқ тузатиш ишларига» жўнатишга қарор қилган. «10 миллион тугади, Федерал антимонополия хизматининг (ФАХ) жаримасини эса тўлаш керак», — дейилади постда. «Альфа-банк»дагилар шунингдек, рэпернинг штатда бўлиши «банкнинг реал ходими имижига зид бўлмаслигига» умид қилиб, «янги директорнинг кўйлагидаги қирқимнинг катталигини кузатиш»га ваъда берган.

Аввалроқ ФАХ банкнинг Моргенштерн суратга тушган «10 миллионлик клип» реклама ролигига нисбатан иш очганди. Хизматга видеода алкоголь истеъмол қилингани, банк ходимларининг номақбул ҳаёт тарзи намойиш этилгани, шунингдек, «аёллар учун камситувчи» бўлган ҳаракатлар амалга оширилгани ёқмаган.

Шундан сўнг «Альфа-банк» Моргенштерннинг клипи — бу «том маънодаги реклама эмас», балки «блогернинг қарашлари» эканлигини айтган. Ролик 20 миллион маротабадан ортиқ томоша қилинган ва 25 мингга яқин мижозни жалб этишга ёрдам берган. 19 мартга қадар «Альфа-банк» ва Моргенштерн «шикоятлар бўйича» ФАХга ёзма тушунтириш хатини беришлари керак. Хизмат эса ишни 25 март куни кўриб чиқади.

Эслатиб ўтамиз, россиялик таниқли рэпер ва бастакор Алишер Валиев (тахаллуси Моргенштерн) 2020 йилнинг октябрида Instagram’да Mercedes-Benz E200 машинаси учун танлов ўтказган ва унда Бухорода яшовчи @aza_1002 аккаунти эгаси Азим Абдуллаев ғалаба қозонган эди.