Тошкентдаги кафеларнинг бирида 45 киши иштирокида оммавий муштлашув содир бўлди (видео)

Тошкентнинг Чилонзор туманида жойлашган «Троя» кафесида оммавий муштлашув юз берди. Бу ҳақда Тошкент шаҳар ИИББ ахборот хизмати хабар берди.

Маълум қилинишича, мазкур ҳодиса 2021 йил 8 январь куни 23:30 ларда содир бўлган. Ички ишлар органлари олиб борган дастлабки тергов ҳаракатлари маълумотларига кўра, кафеда ўтирган меҳмонларнинг бир гуруҳи ва қўшни столдаги бошқа мижозлар ўртасида жанжал юзага келган.

«Кафе қўриқчилари меҳмонларни тинчлантиришга ҳаракат қилган. Жазавага тушган меҳмонлар огоҳлантиришларга қарамай, воқеани янада кескинлаштириб юборган. Оқибатда мижозлар ва кафе қўриқчилари ўртасида муштлашув юзага келган», — дейилади хабарда.

Кафе ходимлари ички ишлар ходимларига қўнғироқ қилиш ўрнига жанжални ўзлари чақирган муштумзўрлар билан давом эттирган.

Суд тиббий экспертизасининг маълум қилишича, уч нафар мижознинг олган тан жароҳати соғлиғининг қисқа муддатга бузилишига олиб келган. Ушбу жанжалда жами 45 нафар одам иштирок этган. Мазкур ҳолат юзасидан Жиноят кодексининг 277-моддаси (безорилик) билан жиноят иши қўзғатилган бўлиб, ҳозирда дастлабки тергов ҳаракатлари олиб борилмоқда.

Аввалроқ Самарқанддаги кафе яқинида жанжаллашган шахслар бир-бирларига даъволари йўқлигига қарамай, 3 суткага қамалгани, «Сингапур» ва «Вестминстер» талабалари футбол учрашувидан сўнг оммавий муштлашиб кетгани тўғрисида хабар берилганди.