Ижтимоий тармоқларда Соғлиқни сақлаш вазирлиги ҳузуридаги Санитария-эпидемиологик осойишталик ва жамоат саломатлиги хизматининг (CЕХ) Тошкент шаҳар бошқармаси бошлиғи Малика Қудратхўжаева томонидан 13 март куни Ўзбекистон соғлиқни сақлаш вазири ўринбосари — Тошкент шаҳар Соғлиқни сақлаш бош бошқармаси бошлиғи Анвар Алимов номига кўрсатма хати нусхаси пайдо бўлди. Хатнинг ҳақиқий эканини «Дарё»нинг расмий доиралардаги манбаси тасдиқлади.
Хатда таъкидланишича, «жорий йилнинг ўтган даври мобайнида Тошкент шаҳри бўйича жами 1717 нафар беморда коронавирус инфекцияси рўйхатга олинган». Бунда гап айнан қайси сана ҳақида кетаётганига аниқлик киритилмаган («Дарё»нинг Соғлиқни сақлаш вазирлиги томонидан эълон қилиб борилаётган кунлик коронавирус статистикага таяниб олиб борган ҳисоб-китобига кўра, йил бошидан то 10 мартга қадар Тошкент шаҳрида жами 1753 та касалланиш ҳолати аниқланган эди).
CЕХ маълумотларига кўра, аниқланган 1717 беморнинг 222 нафари (13 фоизи) 14 ёшгача бўлган болалар, 78 нафари (4,5 фоизи) 15-19 ёшлилар, 210 нафари (12,2 фоизи) 20-29 ёшлилар, 264 нафари (15,4 фоизи) 30-39 ёшлилар, 234 нафари (13,5 фоизи) 40-49 ёшлилар, 244 нафари (14,3 фоизи) 50-59 ёшлилар, 465 нафари (27,1 фоизи) 60 ёш ва ундан катталардир.
«Ижтимоий таркибига кўра, 315 нафар (18,3 фоиз) бемор корхона, ташкилот, муассаса ходимлари, 630 нафари (36,7 фоизи) уй бекалари, 48 нафари (2,9 фоизи) тиббиёт ходимлари, 57 нафари (3,3 фоизи) олийгоҳ талабалари, 181 нафари (10,5 фоизи) мактаб ўқувчилари, 76 нафари (4,4 фоизи) уюшмаган болалар, 14 нафари (0,8 фоизи) уюшган болалар, 7 нафари (0,4 фоизи) мурувват уйи тарбияланувчилари, 2 нафари (0,1 фоизи) чет эл фуқаролари, 49 нафари (3,0 фоизи) ўқитувчилар ва 338 нафари (20,0 фоизи) бошқа гуруҳдаги аҳолидир», — дейилади CЕХ хатида.
Мавзуга доир:
Изоҳ (0)