Спорт пойабзаллари анчадан бери фақатгина спорт учун кийилмайди. Қулайлиги учун ҳам уларни турли хил кўйлак, юбка ва шимлар билан уйғунлаштирилганини кўриш мумкин. Аммо бу кроссовкалар ҳар қандай кийим билан мослашаверади, дегани эмас. Бу борада ҳам мода оламида ўзига яраша қонун-қоидалар мавжуд.
Ёрқин рангдаги либослар билан оқ кроссовкалар доим ҳам мос келмайди. Кўйлакнинг ўта ёрқин ранги яққол сезилиб қолиши мумкин. Шунга қарамай, ёрқин рангдаги либосларни хуш кўрувчилар кўйлак рангларига мос равишда кроссовкалар танлайди ва улар мукаммал уйғунликни ҳосил этади.
Агар танланган либос визуал равишда тор бўлса ҳамда қомат бўйлаб ёпишиб турса, у ҳолда қалин ва катта ҳажмдаги кроссовкалар ёрдамга келади. Улар табиий равишда оёқни узун ва ингичка кўрсатади.
Ранг борасида ҳам худди юқоридаги тавсияларга амал қилиш зарур. Кроссовка ранги либоснинг айрим элементи ёки бўлмаса, сумка рангига мос келиши керак. Шундагина ҳар қандай комбинация ажойиб кўринади.
Кроссовкаларнинг афзаллиги шундаки, у баҳор ва ёз учун мўлжалланган кўйлаклар учун ҳам мос келади. Айниқса, иссиқ мавсумда ҳар қандай ёрқин рангли кўйлак билан оқ рангдаги ихчам кроссовкалар кийиш тавсия этилади.
Бироз калта, аммо этаги кенг шифон ёки шунга ўхшаш матоли либослар учун ҳам таг қисми қалин кроссовка яхши кўриниш ҳосил қилади. Улар бўйни баланд кўрсатиши билан бирга, қоматдаги мувозанатни ҳам бир хилда намоён қилади.
Изоҳ (0)