Жаҳон соғлиқни сақлаш ташкилоти (ЖССТ) AstraZeneca компаниясининг коронавирусга қарши вакцинасидан фойдаланишни тўхтатишга сабаб йўқ, деб ҳисоблайди. Бу ҳақда ташкилот вакили Маргарет Харрисга таяниб «Интерфакс» хабар берди.
«Ҳа, биз AstraZeneca вакцинасини қўллашда давом этишимиз керак..., уни ишлатмаслик учун ҳеч қандай сабаб йўқ», — деб таъкидлади Харрис.
Аввалроқ Дания, Норвегия, Таиланд ва Болгария ҳукумати вакцинациядан кейин бир нечта беморларда тромблар пайдо бўлгани сабабли AstraZeneca билан COVID-19’га қарши эмлаш кампаниясини тўхтатиб қўйди.
11 март куни Европа дори-дармон воситалари агентлиги (EMA) қайд этишича, AstraZeneca билан эмлаш қон қуюлиши хавфини оширмайди ва эмлашни давом эттириш мумкин. Канада Соғлиқни сақлаш вазирлиги ҳам худди шундай муносабат билдирди.
AZD1222 вакцинаси AstraZeneca мутахассислари томонидан Оксфорд университети олимлари билан ҳамкорликда ишлаб чиқилган. Бу векторли вакцина ҳисобланади. Векторли вакциналарнинг ишлаш принципи шундаки, уларнинг таркибида заифлашган, соғлиқ учун зарарсиз вирус ва коронавирус генининг янги тури бўлади.
Аввалроқ Бельгия ҳукумати AstraZeneca компаниясининг коронавирусга қарши вакцинаси билан 55 ёшдан ошганларни ҳам эмлаш учун рухсат бергани ҳақида хабар берилган эди.
Изоҳ (0)