11 март куни «Заковат» телеўйинининг Тошкент ва Тошкент вилояти босқичи чемпионлари аниқланди. Финалда Фаррух Рафиқов жамоаси «Ксенофонт шогирдлари» жамоасини мағлуб этиб, биринчи ўринни қўлга киритди. Ўйин «Миллий» телеканали орқали тўғридан-тўғри эфирга узатилди.
Ўйин якунида биринчи ўринни олган жамоага 100 миллион сўм, иккинчи ўринга — 20 миллион сўм, учинчи ўринга — 10 миллион сўм пул мукофоти топширилди.
Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов ва унинг ўринбосари Саида Мирзиёеванинг маълум қилишича, «Заковат»нинг навбатдаги баҳслари Самарқанд шаҳрида бўлиб ўтади.
«Эртага, 12 мартдан бошлаб ‘Zakovat.tv’ сайтимиз орқали Самарқандда бўлиб ўтадиган ўйинларимизга рўйхатдан ўтишингиз мумкин! Тайёргарликни бошланг ва албатта, бизни Самарқандда кутинг! Биз Самарқандга кетяпмиз», — дейилади хабарда.
Эслатиб ўтамиз, январь ўрталарида «Миллий» телеканали «Заковат» намойишини тўхтатгани маълум бўлганди. Кейинроқ Комил Алламжонов ва Саида Мирзиёева эфирдан олинган «Заковат» лойиҳасини ўз оталиғига олган. 28 февраль куни Humo Arena муз саройида «Заковат» телеўйинининг Тошкент шаҳри ва Тошкент вилояти учун интеллектуал кастинги ўтказилди. Тадбирда «Заковат»да иштирок этиш учун рўйхатдан ўтган 7 мингга яқин билимдон қатнашган.
Изоҳ (0)