12 март куни Тошкент шаҳрида Ўзбекистон Олий Мажлиси Сенатининг ўн учинчи ялпи мажлиси ўз ишини бошлади. Бу ҳақда Сенат матбуот хизмати хабар берди.
Маълум қилинишича, мажлисда сенаторлар, Вазирлар Маҳкамаси мутасаддилари, вазирлик ва идоралар раҳбарлари, Сенат ҳузуридаги Ёшлар парламенти аъзолари ҳамда оммавий ахборот воситалари вакиллари иштирок этмоқда.
Видеоконференцалоқа тарзида ўтказилаётган ялпи мажлисни Олий Мажлис Сенати раиси Танзила Норбоева олиб бормоқда.
Ялпи мажлисда кўриб чиқиладиган масалаларни Сенатнинг расмий веб-сайти ва ижтимоий тармоқлардаги саҳифалари ҳамда UzReport-TV телеканали орқали тўғридан-тўғри жонли эфирда кузатиб бориш мумкин.
Видеоконференцалоқа тарзида ўтказиладиган ялпи мажлисда «Ўзбекистон Республикасининг Конституциявий суди тўғрисида»ги Конституциявий қонуни, қолаверса, «Давлат харидлари тўғрисида»ги, «Экологик аудит тўғрисида»ги, «Деҳқон хўжалиги тўғрисида»ги, «Томорқа хўжалиги тўғрисида»ги, «Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги Ўзбекистон қонунларини кўриб чиқиш режалаштирилган.
Ташқи ишлар вазирлигининг 2020 йилдаги фаолияти тўғрисидаги ахбороти, ички ишлар вазирининг ҳуқуқбузарликларнинг олдини олиш ва уларнинг профилактикаси ҳолати тўғрисидаги 2020 йил якуни бўйича ахбороти кўриб чиқилади.
Изоҳ (0)