Туз таъсирида ривожланиши мумкин бўлган 4 та жиддий касаллик

Саломатликка зарар етказмаслик учун шифокорлар ҳар куни туз истеъмолини 5 граммдан оширмасликни маслаҳат беради. Аксарият ҳолларда ушбу меъёр ортиб кетиши табиий, кўпчилик буни ҳатто билмайди ҳам. Сабаби кўплаб озиқ-овқатлар таркибида яширин туз миқдори мавжуд бўлиб, айниқса, тайёр овқатлар том маънода натрий билан тўйинган бўлади. Афсуски, тавсия этилган туз истеъмолининг миқдорини ошириб бориш соғлиқ учун хавфлидир. Шунингдек, ушбу жараён организмда жиддий касалликлар ривожланишига олиб келади. Ҳар куни оз миқдорда туз истеъмол қилиш орқали сезиларли даражада камайиши мумкин бўлган баъзи касалликлар рўйхати билан қуйида танишиб чиқиш мумкин.

Ёш билан боғлиқ деменсия

Қонда натрий миқдори қанча юқори бўлса, тафаккур бузилиши хавфи шунча кўпроқ. Колорадо университети тадқиқотчилари шундай хулосага келган. Олиб борилган тажриба натижаларига кўра, 65 ёшдан ошган инсонларда, айниқса, мунтазам равишда меъёридан ортиқ туз истеъмол қиладиганларда деменсия касаллигининг ривожланиши 30 фоизга ошади.

Буйракда тошлар

Туз жуда кўп истеъмол қилинса, пешобда оқсил миқдори кўпаяди. Бу буйрак касаллиги ҳамда унда тошлар пайдо бўлишига олиб келиши мумкин бўлган асосий омиллардан биридир. Агар буйраклар фаолияти яхши бўлса, уларни узоқ вақт соғлом сақлаш учун туз истеъмолини меъёрдан оширмаслик тавсия этилади.

Ошқозон яраси

Кўп туз истеъмол қилиш ўз-ўзидан ошқозон ярасини қўзғатмаслиги мумкин. Аммо шиллиқ қават Helicobacter pylori бактериялари томонидан зарарланган бўлса, унда натрийни ортиқча истеъмол қилиш хавфни бир неча баробарга оширади.

Гипертония

Туз танадаги суюқликни ушлаб туради, бу эса юрак ишлашини қийинлаштиради. Натижада қон босими ошиши ҳолати кузатилади. Агар беморда қон босими мунтазам равишда кўтарилиб турса, туз ҳамда у қўшиладиган маҳсулотлар истеъмолини камайтириш керак.