Дунёнинг кўплаб мамлакатларида мактаб ўқувчилари коронавирус пандемияси сабабли масофавий шаклда таълим олмоқда. Лекин баъзи давлатларда мактаблар одатий таълим шаклини қайта тиклади, яна баъзилари эса бунга тайёргарлик кўрмоқда. Бу ҳақда «Интерфакс» хабар берди.
Аксарият Европа мамлакатларида таълим муассасалари, шу жумладан, болалар боғчалари аллақачон очилган бўлса-да, бир қатор чекловлар мавжуд.
Германияда 22 февралдан бошлаб бошланғич мактаблар очилди, ўқувчилар навбатма-навбат гуруҳларга бўлиниб ўқитилмоқда. Қоидалар минтақаларга қараб фарқ қилади. Масалан, Берлинда ўқувчилар 22 февралдан дарсларга қатнаши мумкин, лекин бу улар учун мажбурий эмас, машғулотларда онлайн тарзда иштирок этиш ҳам мумкин. Мактабга келиб, таълим олишни истаганлар тиббий ниқоб тақиши ва 1,5 метрлик ижтимоий масофага амал қилиши лозим. 4-синфдан 6-синфгача бўлган ўқувчилар учун 9 мартдан ўқув жараёнлари бошланди. 10—13-синф ўқувчилари 17 мартдан бошлаб дарсларга қатнаши мумкин бўлади. Аввалроқ Германияда карантин муддати 28 мартгача узайтирилган эди.
Франция 2020 йилнинг май ойидан бери мактабларни деярли ёпмади. Таълим муассасаларида қатъий санитар-эпидемиологик чоралар жорий қилинган. 25 февраль куни бош вазир Жан Кастекс француз ҳукуматининг шундай узоқ муддат давомида мактабларнинг кундузги фаолиятини тўхтатмай «яхши қарор» қабул қилганини таъкидлади. Хусусан, 31 январдан бошлаб Франция Европа Иттифоқига аъзо бўлмаган мамлакатлардан келувчилар учун мамлакатга киришни тақиқлади.
Испанияда мактаблар 2020 йилнинг сентябрь ойида қайта иш бошлади. Тиббий ниқоб тақиш мажбурияти ўқувчиларнинг ёшига қараб фарқ қилади. Шунингдек, агар битта ўқувчида COVID-19 аниқланса, унинг барча синфдошлари карантинга олинади.
Аввалроқ Испанияда AstraZeneca вакцинаси билан кексаларни эмлаш тақиқлаб қўйилган эди.
Ўз навбатида Бельгия ҳукумати коронавирус пандемияси сабабли жорий қилинган чекловларнинг юмшатилишини муҳокама қилар экан, асосий муаммо мактаблардаги одатий ўқув жараёнларининг бузилиши эканини таъкидлаб келди. 2020 йилнинг кузида пандемиянинг иккинчи тўлқини бошланганидан бери ўрта мактаб ўқувчиларининг аксарияти гибрид таълимга ўтди: дарсларнинг 50 фоизи анъанавий, 50 фоизи масофавий тарзда ташкил этилди. 5 март куни ўқиш қийин бўлган талабаларга март ойидан анъанавий дарсларга қайтиш учун рухсат берилди. 19 апрелдан бошлаб, Пасха байрамидан кейин бошланғич ва ўрта мактабнинг барча ўқувчилари тўлиқ анъанавий таълимга қайтиши мумкин. Бундан олдин Бельгияда AstraZeneca вакцинаси учун ёш билан боғлиқ чекловлар бекор қилинган эди.
Италияда бош вазир Марио Драги коронавируснинг кенг тарқалган «қизил» ҳудудлардаги барча таълим муассасаларининг ёпилиши тўғрисидаги буйруқни имзолади. Шунингдек, хавфнинг «тўқ сариқ» ёки «сариқ» даражасидаги ҳудудлар губернаторлари ҳам ўз ташаббуси билан таълим муассасаларининг фаолиятини тўхтатди. Натижада италиялик ўқувчиларнинг асосий қисми масофадан туриб таҳсил олмоқда. Мамлакат расмийлари таълим муассасалари қачон нормал иш фаолиятини бошлаши тўғрисида маълумот бермаяпти.
Маълумот учун, Италия президенти Сержо Маттарелла Lazzaro Spallanzani номли Рим Миллий юқумли касалликлар институтида коронавирусга қарши эмланди.
Португалия Европа Иттифоқининг энг қатъий COVID-19 чекловлари қўлланилаётган мамлакатларидан бири бўлиб қолмоқда. Мамлакатда мактаблар ҳалигача фаолиятини бошламаган. 11 март куни ҳукумат хавфсизлик чораларини бекор қилиш режасини кўриб чиқади, бунда ўқувчиларнинг мактабга қандай тартиб-қоидалар асосида қайтиши белгиланади. «Публику» нашрининг ёзишича, давлат мактабларининг директорлари ёш болаларни иложи борича тезроқ мактабга қайтаришни талаб қилмоқда, чунки уларнинг бошқалардан кўра изоляцияга тоқат қилиши қийинроқ кечади. Шунингдек, уларнинг фикрига кўра, биринчи навбатда мактабгача таълим марказлари ва болалар боғчаларини очиш лозим. Шунингдек, Германия ҳарбийлари Португалияга COVID-19’га қарши курашда ёрдам беради.
Буюк Британиянинг миллионлаб ўқувчилари шу ҳафтада мактабларга қайтди. Бунгача ўқувчилар икки ойдан кўпроқ масофавий таълим олди. Кўплаб Британия мактаблари ҳали тўлиқ очилмаган, улар анъанавий дарсларни бошлашдан олдин ўқувчилардан коронавирусга тест олинади. Тиббий ниқоб тақиш ва ўқувчилардан COVID-19’га тест олиш тавсия этилади, лекин бу мажбурий эмас. Мамлакатда коронавирус бўйича хавф даражаси пасайтирилди.
Яқин Шарқ мамлакатларининг мактабларида ҳам таълим жараёнлари билан боғлиқ муаммолар кузатилмоқда. Мисол учун, Иорданияда мактаблар атиги бир ой ишлади ва 10 мартдан бошлаб коронавирус билан касалланиш кўпайгани сабабли яна ёпилди. Болалар яна қачон мактабларга қайтиши ҳозирча номаълум. Евроиттифоқ эса Яқин Шарқ ва Шимолий Африка давлатларини ривожлантириш учун 7 миллиард евро ажратади.
Коронавирусга қарши эмлаш авж олган Исроилда ҳали барча мактаблар фаолиятини қайта тиклаганича йўқ. Лекин ҳукумат коронавирус устидан ғалаба қозонилгани ҳақида эълон қилди. Мамлакатда 50 ёшдан ошганларнинг камида 70 фоизи эмланган шаҳарларда ўрта мактабнинг юқори синф ўқувчилари анъанавий таълимга қайтди. Кўплаб шаҳарларда ўқувчилар ҳафтасига камида икки-уч кун дарсларга қатнаяпти, лекин баъзи жойларда ўқувчилар таълимни тўлиқ масофавий шаклда давом эттирмоқда.
COVID-19’нинг кенг тарқалган ҳудудларидан бири бўлган Бразилияда мактаблар, хусусан, давлат таълим муассасаларининг фаолияти тикланмаган. Лекин баъзи штатларда хусусий мактаблар фаолияти йўлга қўйилган. Мутахассислар болалар таълим муассасаларининг очилишини танқид қилмоқда, чунки бу жойларда вирус билан зарарланиш хавфи юқори. Улар шу каби хатарлардан огоҳлантириб, иложи борича мактабларни узоқроқ муддат очмасликка чақирмоқда. Маълумот учун, Бразилияда Pfizer вакцинаси фойдаланиш учун тасдиқланган.
Хитойда коронавирус сабабли таълим жараёнлари 2020 йилнинг февраль ойи охирига қадар қайта тикланмади. Тўгараклар ва ҳар қандай қўшимча машғулотларнинг анъанавий тарзда ўтилиши тақиқланди. Ўқувчилар ўз ҳудудларида эпидемиологик вазият яхшиланганидан кейин мактабларга ва бошқа ўқув муассасаларига қайтди. Бу ҳар хил вақтда рўй берди. Шанхай ва Гуандунда мактаблар апрель ойидан бошлаб очила бошлади, Уханда эса улар етти ойга ёпилди. Мактаблар узил-кесил 2020 йилнинг сентябрь ойида очилди. Бу вақтга келиб мамлакатда коронавирус инфекциясининг саноқли ҳолатлари рўйхатга олинган эди. Эҳтиёт чоралари ҳудудлардаги вазиятга қараб кўрилган эди. Аввалроқ Хитойда кўршапалакларнинг биоматериалида SARS-CoV-2 вируси аниқлангани ҳақида хабар берилган эди.
Изоҳ (0)