АҚШнинг Невада штатида 1987 йилда ишлаб чиқарилган Freightliner магистрал юк машинаси сотувга қўйилди. «Бамблби» фильмининг суратга олиш ишларида иштирок этган машина 21,6 минг долларга баҳоланмоқда, деб хабар беради Motor.
Сотувга қўйилган Freightliner’нинг ўзига хос асосий жиҳати — юк машинаси «Бамблби» фильмининг якуний саҳналаридан бирида иштирок этганида. Магистрал шатакчи Optimus Praym автоботларининг йўлбошчиси ролини ўйнаган. Суратга олиш давомида юк машинасининг кузовига бироз шикаст етган. Хусусан, Freightliner’нинг ҳайдовчи ўриндиғи ва радиатор панжараси таъмирга муҳтож. Юк машина эгаси аввалига кузовни қайта тиклашни режалаштирган, бироқ охир-оқибат шатакчини шундай ҳолатда сотувга қўйишга қарор қилган.
Сотувчининг сўзларига кўра, Freightliner’нинг барча техник элементлари соз ҳолатда ва таъмир талаб қилмайди. Юк машинаси 350 от кучига эга Cummins Big Cam III дизель мотори билан жиҳозланган. Агрегат тўққиз поғонали Eaton Fuller механик трансмиссияси билан бирга ишлайди. Магистрал шатакчи деярли бир йил ҳаракатсиз турган. Кунлик фойдаланиш давомида машина ҳафтасига 4 минг километрга яқин йўл босиб келган. Ҳозирга қадар Freightliner жами қанча масофа босгани номаълум.
34 йиллик темир «киноқаҳрамон»ни 21,6 минг доллар эвазига харид қилиш мумкин.
Аввалроқ йиғиш учун 2000 соат сарфланган олти ғилдиракли сёрферлар услубидаги юк машинаси намойиш этилгани тўғрисида хабар берилганди.
Изоҳ (0)