2002 йилдан 2019 йилгача инсониятнинг фаолияти 600 минг квадрат километр ўрмонни вайрон қилди, бу деярли Франция ҳудуди билан тенг майдон ҳисобланади. Ёши улуғ тропик ўрмонларнинг 34 фоизи йўқ қилинди ва яна 30 фоизи чириб, нобуд бўлган. Бу ҳақда Rainforest Foundation Norway нодавлат ташкилоти тадқиқотларига таяниб TJournal хабар берди.
Йўқотишларнинг аксарияти Жанубий Америка Амазонкасида ва у билан чегарадош тропик ўрмонларда содир бўлди. Фонд тадқиқотчиларининг фикрига кўра, кўпроқ тропик ўрмонлар вайрон бўлгани сабабли иқлим ўзгариши эҳтимоли кучайиб, қолган ўрмонларга хавф солган. Олимларнинг бошқа муқобил позицияси ҳам мавжуд, унга кўра, ўтинни ёқиш пайтида карбонат ангидрид газининг чиқиши зарар етказмайди, балки дарахтларга ёрдам беради, бу эса ўрмон майдонларининг кенгайишига олиб келади.
Жануби-шарқий Осиёнинг асосан Индонезияда жойлашган ороллари 2002 йилдан бери ўрмонларни йўқ қилиш бўйича иккинчи ўринни эгаллаб турибди. Уларнинг аксарияти мойли палма плантациялари учун тозаланган. Учинчи ўринда Марказий Африка, асосан Конго ҳавзаси жойлашган бўлиб, у ерда қишлоқ хўжалиги участкалари ва дарахтзорлар жойлашган.
Rainforest Foundation фондида таъкидланишича, ҳисоботда чириган деб белгиланган ўрмонлар қисман йўқ қилинган ёки иккиламчи ўрмонлар билан алмаштирилган. Шунингдек, бразилиялик тадқиқотчилар фикрига кўра, ҳисоботда омон қолган ўрмонлар таърифи жуда салбий қилиб берилган, шунинг учун йўқотишлар кўлами бир оз ошириб кўрсатилган бўлиши мумкин.
Аввалроқ Жанубий Кореяда кенг кўламли ўрмон ёнғини рўй берганди.
Изоҳ (0)