Исломободда амалий ташриф билан бўлиб турган Ўзбекистон ташқи ишлар вазири Абдулазиз Комилов 2021 йилнинг 10 март куни Покистон бош вазири Имрон Хон томонидан қабул қилинди. Бу ҳақда вазирлик матбуот хизмати хабар қилди.
Вазир Ўзбекистон Президенти Шавкат Мирзиёевнинг Покистон бош вазири Имрон Хонга йўллаган мактубини етказди.
Музокаралар чоғида икки томонлама кун тартибининг муҳим жиҳатлари, хусусан, сиёсий, савдо-иқтисодий, инвестициявий, транспорт-коммуникация, маданий-гуманитар ва бошқа соҳаларда Ўзбекистон–Покистон муносабатларини янада ривожлантиришнинг истиқболли йўналишлари муҳокама қилинди.
Минтақавий масалаларга, биринчи навбатда, Афғонистон заминида тинчлик ва барқарорликни таъминлашга алоҳида эътибор қаратилди.
Шу нуқтаи назардан, Афғонистон иқтисодиётини тиклашга ёрдам берадиган инфратузилма лойиҳаларини, жумладан, улар орасида энг муҳими Мозори-Шариф—Кобул—Пешавор темир йўлини амалга ошириш юзасидан ўзаро ҳамкорлик тўғрисида фикр алмашилди. Бу Покистоннинг Карачи ва Гвадар денгиз портларига кириш имконини беради. Ўз навбатида эса Ўзбекистон билан Покистон ҳамда Марказий ва Жанубий Осиё ўртасидаги ўзаро савдо ҳажмини оширишга имкон беради.
Мулоқот давомида томонларни қизиқтирган бошқа масалалар ҳам кўриб чиқилди.
Шунингдек, Абдулазиз Комилов Покистон ташқи ишлар вазири Шоҳ Маҳмуд Қурайший билан учрашди.
Музокаралар чоғида кўп қиррали Ўзбекистон–Покистон муносабатларининг ҳозирги ҳолати ва ривожланиш истиқболлари муҳокама қилинди.
Ўзаро савдо ҳажмини янада ошириш, унинг турини кенгайтириш, қўшма инвестиция ва инфратузилма лойиҳаларини фаол амалга ошириш юзасидан келишувларга эришилди. Шу мақсадда икки мамлакат ҳукуматлари имтиёзли савдо, банк ва божхона ҳамкорлигини йўлга қўйиш, шунингдек, мунтазам парвозларни тиклаш бўйича фаол иш олиб бормоқда.
Ташқи ишлар вазирлари афғонлараро музокараларни йўлга қўйиш, Афғонистонда барқарор тинчлик ўрнатишга кўмаклашиш учун халқаро ҳамжамиятнинг саъй-ҳаракатларини бирлаштириш муҳимлигини қайд этдилар.
Маданий-гуманитар муносабатлар, шунингдек, туризм соҳасидаги ўзаро алоқаларга алоҳида эътибор қаратилди. Тарихий, маданий ва маънавий жиҳатдан минтақалар ва мамлакатлар цивилизацияси ўзаро манфаатли ҳамкорликнинг ишончли асоси бўлиб хизмат қилиши таъкидланди.
Вазирлар БМТ, ИҲТ, ШҲТ, Иқтисодий ҳамкорлик ташкилоти ва бошқа халқаро ҳамда минтақавий тузилмалар доирасидаги кўп томонлама ҳамкорлик масалаларини муҳокама қилди.
Шунингдек, Ўзбекистон ва Покистон ўртасидаги ҳарбий-техник ҳамкорликни янада ривожлантириш истиқболлари муҳокама қилинди.
Покистон ташқи ишлар вазири 2021 йил Тошкент шаҳрида бўлиб ўтадиган «Марказий ва Жанубий Осиё: минтақавий боғлиқлик. Таҳдидлар ва имкониятлар» мавзусидаги халқаро конференцияга таклиф қилинди.
Турли даражадаги тадбирлар жадвали ва уларнинг ташкилий жиҳатлари кўриб чиқилди
Учрашувда томонлар ўзларини қизиқтирган минтақавий ва глобал кун тартибининг бошқа масалалари бўйича ҳам фикр алмашди.
Бундан аввал Абдулазиз Комилов Европа Иттифоқининг Ўзбекистондаги делегацияси раҳбарини қабул қилгани, Ўзбекистон ва Россия ТИВ раҳбарлари Шавкат Мирзиёевнинг Москвага кутилаётган ташрифига тайёргарликни муҳокама қилгани ҳамда Шавкат Мирзиёев Иқтисодий ҳамкорлик ташкилотининг 14-саммитида иштирок этиб, нутқ сўзлагани ҳақида хабар берилганди.
Изоҳ (0)