Тошкент шаҳрининг Бектемир туманида куёв шаръий никоҳида бўлган аёли ўртасида келиб чиққан ўзаро келишмовчилик оқибатида унинг онасига тан жароҳати етказиб, отасига пичоқ урди. Бу ҳақда Олий суд матбуот хизмати хабар берди.
Жиноят ишлари бўйича Бектемир туман суди раиси Ирода Муҳамедованинг маълум қилишича, воқеа 2020 йил 29 июлда юз берган.
К.И. турмушидан ажрашган, бир нафар фарзанди борлигига қарамай, 2016 йилда танишган Д.Ҳ. билан шаръий никоҳдан ўтиб, яшаб келган. Бундан фақат аёлнинг ота-онаси хабардор бўлган. 2017 йилда йигит ота-онасининг қистови билан М. исмли қизга қонунан уйланган ва ҳар иккиси билан ҳам яшай бошлаган. 2019 йилнинг декабрида М. қиз фарзанд, 2020 йилнинг февралида Д.Ҳ. ўғил фарзанд кўрган.
2020 йилнинг март–апрель ойларида К.И. ва Д.Ҳ. ўрталарида тушунмовчиликлар авжига чиқиб, тез-тез жанжал бўлиб турган. Шу сабабли Д.Ҳ. аразлаб, қариндошларининг уйига кетиб қоладиган одат чиқарган. 2020 йилнинг 24 июль куни турмуш ўртоғи Д.Ҳ.ни йўқотиб қўйиб, у билан икки кун қўнғироқ қилиб боғлана олмаган. 26 июль куни қўнғироқ қилганида аёл Нурафшон шаҳрида яшовчи холасининг уйида эканлигини айтган, К.И. унинг гапларига ишонмай, хиёнатда гумон қилган.
Жанжал бир неча кун давом этган. К.И. аёлига унинг бу юриши боласи тарбиясига салбий таъсир кўрсатишини айтиб, уни олиб қўйишини билдирган. Ўша воқеа содир бўлган куни эр унинг уйига борган ва эшик ёпиқлиги учун девор орқали ҳовлига сакраб тушган. Йўлини қайнанаси Г.Ҳ. тўсганида уни тирсаги билан туртиб юборган. Оқибатда у йиқилиб, тан жароҳати олган.
Бу ҳолатни кўрган қайнатаси С.Ҳ. унинг ёнига келиб, бор кучи билан ёқасидан тортган. Бундан жаҳл чиққан К.И. чўнтагида бўлган сувенир (финка) пичоқ билан унинг кўкрак, қорин ва елка соҳасига тан жароҳати етказиб, ҳодиса жойидан яширинган. ИИБ ходимлари томонидан олиб борилган тезкор суриштирув ишлари натижасида К.I. ўз хонадонида қўлга олинган.
К.И. Жиноят кодексининг 104-моддаси (қасддан баданга оғир шикаст етказиш) 3‑қисми «а» банди билан айбли, деб топилган. Судда у қилмишидан пушаймонлигини, ҳаммасини жаҳл устида қилганини айтган. Унга нисбатан Жиноят кодексининг 57‑моддаси (енгилроқ жазо тайинлаш)ни қўллаган ҳолда 5 йил озодликдан маҳрум қилиш жазоси тайинланган.
Аввалроқ Фарғонада келинини пичоқлаб ўлдирган қайната 10 йилга озодликдан маҳрум қилингани, Андижонда собиқ турмуш ўртоғи ва қайнатасини пичоқлаб ўлдирган эркак қўлга олингани, Фарғоналик эркак ҳомиладор хотини ва қайнатасини чопиб ташлагани ҳақида хабар берилган эди.
Изоҳ (0)