Андижонда коронавирус инфекциясини текшириш учун мўлжалланган 34 дона сохта ПЗР-тестни сотишга уринган шахслар қўлга олинди. Бу ҳақда вилоят ИИБ ахборот хизмати хабар берди.
Маълум қилинишича, 21 январь куни Андижон туманида яшовчи С.Ж. ва Д.А. исмли шахслар фуқаро О.Д.га 34 дона COVID-19 инфекциясини текшириш учун мўлжалланган сохта ПЗР-тестни жами 1,750 миллион сўмга сотаётганида қўлга олинган.
Шунингдек, 29 январь куни Хўжаобод туманида яшовчи фуқаро З.Ж. ноқонуний равишда коронавирус инфекциясини текшириш учун мўлжалланган 4 дона ПЗР-тестни тегишли анализлар олмасдан, фуқаро С.С.га 320 минг сўм эвазига сотаётган вақтида ушланган.
З.Ж.дан 320 минг, С.С.дан 4 дона ПЗР-тести холислар иштирокида баённома орқали расмийлаштирилиб, Хўжаобод тумани ИИБ ихтиёрига олинган. Суриштирув давомида аниқланишича, З.Ж. 4 дона ноқонуний равишда тайёрланган ПЗР-тестни Жалақудуқ туманида яшовчи фуқаро А.Д.дан сотиб олган.
Фуқаро А.Д.дан 1 дона Lenovo русумли компьютер ҳамда 1 дона Epson номли принтер далилий ашё тариқасида баённома орқали ИИБ ихтиёрига олинган.
Мазкур ҳолатлар бўйича Жиноят кодексининг 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) 2-қисми «б» банди билан жиноят иши қўзғатилиб, ҳозирда тергов ҳаракатлари олиб борилмоқда.
Аввалроқ Тошкент халқаро аэропортида сохта ПЗР-тест маълумотномасини сотаётган гуруҳ ушлангани ҳақида хабар берилганди.
Изоҳ (0)