Дастлаб Буюк Британияда аниқланган ва юқумлироқ деб таърифланаётган VOC 202012/01 штамми ўтган бир ҳафта ичида яна бешта мамлакатда аниқланди. Шу билан мазкур вирус аниқланган мамлакатлар сони 111 тага етди. Бу ҳақда «ТАСС» хабар берди.
Шунингдек, Жанубий Африка штамми 58 мамлакатда, Бразилия штамми эса 32 мамлакатда қайд этилган, дея таъкидлади Жаҳон соғлиқни сақлаш ташкилоти (ЖССТ) мутахассислари.
Тадқиқот натижаларига кўра, вируснинг «британча» штамми дастлаб маълум бўлган SARS-CoV-2 штаммига қараганда 36-75 фоизга юқумлироқ.
Шунингдек, ушбу вариантни юқтирган беморларни касалхонага ётқизиш хавфи ортади, касаллик янада оғирроқ кечади ва ўлим хавфи юқори бўлади.
Ўзбекистон Соғлиқни сақлаш вазирлиги 30 январь куни мамлакатда илк бор коронавируснинг янги штамми аниқлангани ҳақида хабар берди. Янги штамм Дубайдан 23 январь куни мамлакатга қайтган оиланинг 10 яшар фарзандида аниқланган. Маълум қилинишича, касаллик юқтирган қизалоқ шифохонада даволаниб, уйга жавоб берилган.
Аввалроқ Италиянинг шимолидаги Брешия шаҳрида олимлар коронавируснинг «нигерияча» штаммини аниқлагани ҳақида хабар берилган эди.
Изоҳ (0)