Шавкат Мирзиёевнинг таклифига биноан Қирғизистон президенти Садир Жапаров 11—12 март кунлари давлат ташрифи билан Ўзбекистонда бўлади. Бу ҳақда Президент матбуот хизмати хабар берди.
Бўлажак олий даражадаги музокараларда Ўзбекистон билан Қирғизистон ўртасидаги дўстлик, яхши қўшничилик ва стратегик шериклик муносабатларини янада ривожлантириш ва мустаҳкамлаш масалаларининг барча йўналишларини кўриб чиқиш режалаштирилган.
Икки мамлакат етакчилари учрашувининг кун тартибидан конструктив сиёсий мулоқотни давом эттириш, савдо, саноат, транспорт, энергетика, қишлоқ ва сув хўжалиги соҳаларида кўп қиррали ҳамкорликни кенгайтириш, парламентлараро ва ҳудудлараро алоқаларни фаоллаштириш, маданият, соғлиқни сақлаш, таълим ва туризм борасидаги қўшма дастурларни амалга оширишнинг долзарб жиҳатлари ўрин олган.
Учрашувда халқаро сиёсат ва минтақавий ҳамкорлик масалалари юзасидан фикр алмашилади.
Музокаралар якунида давлат раҳбарларининг қўшма баёноти қабул қилиниши, шунингдек, икки томонлама муносабатларнинг турли йўналишларига алоқадор қатор ҳукуматлараро ва идоралараро ҳужжатлар имзоланиши кўзда тутилган.
Ташриф дастурига мувофиқ Қирғизистон президенти Ўзбекистон Олий Мажлисининг иккала палатаси раҳбарлари ва бош вазири билан ҳам учрашувлар ўтказади, мамлакат саноат корхоналари фаолияти билан танишади.
Эслатиб ўтамиз, 22 февраль куни Қирғизистон ташқи ишлар вазирининг биринчи ўринбосари Нуран Ниёзалиев ва Ўзбекистон ташқи ишлар вазирининг биринчи ўринбосари Фарҳод Арзиев иштирокидаги видеоконференцалоқада ташрифга тайёргарлик кўриш ва уни ўтказиш масалалари муҳокама қилинганди. 27 февраль куни Абдулазиз Комилов Қирғизистон президенти Садир Жапаров билан учрашиб, унга Шавкат Мирзиёев мактубини топширганди.
Маълумот учун, Садир Жапаров Қирғизистон президенти сифатидаги илк чет эл сафарини 24—25 февраль кунлари Россияга амалга оширган.
Изоҳ (0)