Навоий вилоят ИИБ ахборот хизмати раҳбари Ўктам Усмоновнинг «Дарё»га хабар беришича, Навоий шаҳрида ижара уйини қиморхонага айлантирган шахс қўлга олинган.
Таъкидланишича, якка тартибда йўловчи ташиш фаолияти билан шуғулланувчи 30 ёшли И.Ф. Кармана туманидаги қариндошига тегишли бўлган Навоий шаҳридаги хонадонларнинг бирида ижарада яшаб, уйида қимор ва таваккалчиликка асосланган ўйинларни ташкил қилиб келган.
Аризага кўра Навоий вилоят ИИБ ЖҚБ Уюшган жиноятчиликка қарши курашиш бўлими ҳамда ДХХ вилоят бошқармаси ходимлари ҳамкорлигида ўтказилган тезкор тадбирда фуқаро И.Ф. Навбаҳор туманида яшовчи Л.Р., хатирчилик А.Р. ҳамда Бухоро вилоятининг Шофиркон тумани фуқароси Ш.Р.лар иштирокида ўзаро тил бириктириб, навбатдаги қимор ўйинини ўтказаётган вақтда қўлга олинган.Ўйинга тикилган 3 миллион 698 минг сўм пул ҳамда икки дона ўйин карталари далилий ашё сифатида холислар иштирокида ҳужжатлаштириб олинган.
Ҳолат юзасидан дастлабки тергов олди текширув ҳаракатлари олиб борилиб, қиморхона ташкил қилган фуқаро И.Ф.га нисбатан Жиноят кодексининг 278-моддаси (қимор ва таваккалчиликка асосланган бошқа ўйинларни ташкил этиш ҳамда ўтказиш) қўлланилган. Қимор ўйини иштирокчиларига эса Маъмурий жавобгарлик тўғрисидаги кодекснинг 191-моддаси (қимор ва таваккалчиликка асосланган бошқа ўйинлар) билан айбланиб, маъмурий жавобгарликка тортиш бўйича тўпланган ҳужжатлар Кармана тумани ИИБ ТБга юборилган.
Воқеа юзасидан дастлабки тергов-суриштирув ишлари олиб борилмоқда.
Изоҳ (0)