Тошкент шаҳар ИИББ тадбиркорлик билан шуғулланувчи онаси ИИБ ходимлари томонидан ноқонуний тарзда қўлга олинганини айтган ўғилнинг видеомурожаатига изоҳ берди.
Ижтимоий тармоқларда видеомурожаат билан чиққан йигит тадбиркорлик билан шуғулланувчи онаси ноқонуний тарзда Чилонзор тумани ИИО ФМБ ходимлари томонидан қўлга олингани ва унга ходимлар томонидан шикаст етказилгани таъкидланган.
Пойтахт ИИББнинг маълум қилишича, мазкур хабар ҳақиқатдан йироқ. Видео муаллифининг онаси — 49 ёшли Озода Ш. ҳамда 26 ёшли Дилшодбек Б. айбланувчи тариқасида жиноий ишга жалб қилинган. Чилонзор тумани жиноий ишлар бўйича суди уларга нисбатан қамоққа олиш эҳтиёт чорасини қўллаган.
Мазкур жиноий иш Жиноят кодексининг 169-моддаси 4-қисми «а» банди бўйича масъулияти чекланган жамият раҳбари Санжар Б.нинг аризасига асосан қўзғатилган. Аризачининг маълум қилишича, 2020 йилнинг декабрь ойидан 2021 йилнинг февраль ойига қадар унинг омборхонасидан матолар йўқолган. Зарарнинг умумий миқдори 129 минг АҚШ долларини ташкил этган.
«2021 йилнинг 24 февраль куни Санжар Б. ишчиси Дилшодбек Б.ни омборхонадан ўғрилик қилаётганида ушлаб олган. Санжар Б.нинг саволларига Дилшодбек ўғирланган матоларни Озоданинг тикув цехига олиб бориб сотишини айтган. Матоларнинг доимий харидори бўлган Озодани молларнинг нархи қониқтирмаганлиги боис у Дилшодбек Б. билан тил бириктириб, унга омборхонадан мато ўғирлаб олиб келишини таклиф қилган», — дейилади хабарда.
Ҳозирда тергов ишлари давом этмоқда.
Аввалроқ Чилонзорда омборхонага икки марта кириб, жами 45 миллион сўмлик аёллар оёқ кийимини ўғирлаган шахс ушлангани тўғрисида хабар берилганди.
Изоҳ (0)