Хитой—Қирғизистон—Ўзбекистон темир йўлининг қурилиши Россия ва Қозоғистон учун фойдасиз. Бу ҳақда Қирғизистон юк ташувчилар уюшмаси раҳбари Темирбек Шабданалиев Тазабек нашрига маълум қилди, деб ёзмоқда «Gazeta.uz».
Унинг айтишича, ушбу лойиҳа 20 йилдан ортиқ вақт давомида муҳокама қилинмоқда. Аммо бу вақт ичида у «ўз ўрнидан бир қадам ҳам силжимади».
«Ушбу лойиҳа атрофида қуруқ музокаралар жуда кўп, аммо ҳеч қандай ҳаракат йўқ. Нима учун? Чунки бу йирик давлатлар, хусусан, Қозоғистон ва Россия манфаатларига зиддир. Биз темир йўл қуришни бошласак, улар бир нечта кўрсаткичларни, масалан, сиёсий нуфузини йўқотади», — деб ҳисоблайди мутахассис.
«Биз транспортда ҳам, бошқа кўплаб соҳаларда ҳам ўз сиёсатимизни юритишда эркинроқ бўламиз. Яна бир омили, Қозоғистон ва Россия Хитойдан товарлар олиб ўтишда темир йўл монополистлари ҳисобланади. Россия Хитойдан тортилган жуда узун темир йўлга эга. Қозоғистон бу борада иккинчи ўринда. Қозоғистонда Хитой чегарасига тортилган темир йўл линиялари иккитага етди. Шу сабабли Қозоғистон ва Россия монополияси, таъсири ва авторитетини йўқотишни истамайди», — дейди Темирбек Шабданалиев.
Ташувчилар уюшмаси раҳбарининг айтишича, мана шу сиёсий таъсирдир.
«Агар биз темир йўл қуришни хоҳласак, Қозоғистон ва Россия маъқуллаши керак. Албатта, Россия асосий позицияга эга. Аммо бу масалада Россия доимо сукут сақлаган, на ҳа, на йўқ дейди», — деб қўшимча қилган у.
Аввалроқ Ўзбекистон транспорт вазирлиги матбуот хизмати ҳам Хитойни Марказий Осиё мамлакатлари билан боғлайдиган темир йўл линияси лойиҳаси деярли 20 йилдан бери муҳокама қилинаётганини қайд этганди. Томонлар баланд тоғлар, бориши қийин бўлган ҳудудлар орқали ўтадиган ушбу темир йўл эни, унинг маршрутлари бўйича ягона тўхтамга кела олмаяпти.
Дастлабки ҳисоб-китобларга кўра, Хитой—Қирғизистон—Ўзбекистон темир йўлининг қурилиши Шарқий Осиёдан яқин Шарқ ва Жанубий Европага борадиган йўлни 900 километрга қисқартиради ва вақт 7-8 кунга камаяди. Йўл қурилиши Марказий Осиё мамлакатларининг транспорт инфратузилмасини ривожлантиришни таъминлайди ва уларга Форс кўрфази ва Тинч океанининг портларига қулай кириш имконини беради.
Изоҳ (0)