Сурхондарё вилоятининг Термиз туманида икки кишини ҳарбий қисмга ишга жойлаштириб қўймоқчи бўлган шахсга жиноят иши қўзғатилди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Б.Х. икки нафар фуқарога ўзини ҳарбий қисмларнинг бирида юқори лавозимда ишловчи ходим сифатида таништириб, уларни 3 000 доллар эвазига ҳарбий қисмга ишга жойлаштириб қўйишни ваъда қилган.
Келишилган пулдан 400 долларни олган вақтида департаментнинг Термиз туман бўлими томонидан ДХХ ва Миллий гвардия ходимлари билан ҳамкорликда ўтказилган тезкор тадбирда ашёвий далиллар билан ушланган.
Ҳолат юзасидан Б.Х.га нисбатан Жиноят кодексининг 168-моддаси (фирибгарлик) ва 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ Тошкентда 4 минг доллар эвазига Миллий гвардия тизимига ишга киритиб қўйишни ваъда қилган шахс ушлангани, фуқароларни 6500 доллар эвазига вагон кузатувчиси лавозимига ишга киритиб қўймоқчи бўлган «Ўзтемир йўлйўловчи» ходимлари қўлга тушгани, Фарғонада янги қурилаётган туғруқхонага ишга киритиб қўйишни ваъда қилиб, 10 кишидан 5,7 минг доллар пора олган тиббиёт ходимлари қўлга олингани ҳақида хабар берилганди.
Изоҳ (0)