Тошкент вилояти Олмалиқ шаҳрида йўл ҳаракати қоидалари талабларини бузиб, бошқа ҳайдовчиларга халақит берган ҳолда манёврларни амалга оширган, шунингдек, шовқин солиб, фуқаролар тинчлигини бузган ҳайдовчилар аниқланди. Бу ҳақда шаҳар ИИБ ахборот хизмати хабар берди.
5 март куни ижтимоий тармоқларда Олмалиқ шаҳрида бир гуруҳ шахслар автомашинада йўл ҳаракати қоидалари талабларини бузган ҳолда бошқа ҳайдовчиларга халақит бериб манёврлар қилгани, шовқин солиб фуқаролар тинчлигини бузгани акс этган видео тарқатилиб, кенг муҳокамаларга сабаб бўлди.
Таъкидланишича, мазкур ҳолат Тошкент вилояти ИИББ назоратида Олмалиқ шаҳар ИИБ ходимлари томонидан ўрганилган ва ҳуқуқбузарларга тегишли чора кўрилиши таъминланган.
Воқеада иштирок этган барча шахслар шаҳар ИИБ ходимлари томонидан аниқланган ҳамда ҳолатга ойдинлик киритиш мақсадида ИИБга таклиф қилинган. Ҳозирда тегишли ҳужжатлар расмийлаштирилиб, қонуний чора кўриш учун суд органларига юборилмоқда.
Маълумотларга кўра, 4 март куни Олмалиқ шаҳар бешинчи кичик ноҳиясида яшовчи 1994 йилда туғилган А.Т.нинг туғилган куни муносабати билан олти нафар (Ш.Т., А.И., Ж.А., Ш.О., И.А., Н.У.) 20-25 ёш орасидаги ёшлар меҳмонга келган.
Шундан сўнг ушбу шахслар соат тахминан 23:30 ларда ўзларига тегишли бўлган беш турдаги автомашиналарда «Абдулла Қаҳҳор» ва «Ислом Каримов» маҳаллаларини туташтирувчи кўчага келиб, автомобилларини йўлнинг қатнов қисмига қўйган ва бошқа ҳаракат қатнашчиларига хавф туғдириб, автомашиналарни катта тезликда бошқарган. Шунингдек, тақиқланган товуш чиқарувчи сигналларини чалиб, яқин атрофда яшовчиларнинг тинчлигини бузиб, қасддан жамиятда юриш-туриш қоидаларига риоя қилмаган.
Эслатиб ўтамиз, 2020 йилнинг октябрида Олмалиқ ҳокимининг Тошкентда соатига 150 километр тезликда машина ҳайдаган ўғли жаримага тортилган эди.
Изоҳ (0)