Ижтимоий тармоқларда 6 март куни UzAuto Motors АЖга қарашли Транспорт ташувлари бошқармасининг ҳайдовчи ходимлари иш ҳақи ва раҳбариятидан норози бўлиб, автотураргоҳ олдида тўплангани акс этган видео тарқалди.
Видеодан кўриш мумкинки, UzAuto Motors томонидан ишлаб чиқарилган автомобилларни республиканинг турли ҳудудларига ташувчи юк машина ҳайдовчилари маошлари кескин тушиб кетганидан норози.
«Бир ойлик иш ҳақим 20 минг сўм чиқибди, баъзиларга 450 сўм иш ҳақи тўланган. Аввал ҳам шунақа қилишган эди. Ҳайдовчилар ойлигидан 800 минг сўмдан ушлаб қолинган. Бизни ҳақорат қилишмоқда. Кечаси билан ухламай ишлаганмиз, керак бўлса, кечаси билан ухлатмай ишлатишяпти. Хоразмгача машина ташиганман.», – дейди ходимлардан бири.
Яна бир ҳайдовчининг маълум қилишича, раҳбарият уларнинг ойлик маошларини бир йил-у уч ойдан буён нотўғри ҳисоб-китоб қилиб келган: «Беш ой ичида бунинг сабабини топдик, дейишди. Нотўғри ҳисобланган пулларни ойлигимиздан тўлар эканмиз».
Унинг қўшимча қилишича, ҳайдовчилар 2018 йилгача яхши ишлаган. Лекин шундан кейин Тошкент шаҳридан раҳбарлар келгач парокандалик ва тушунмовчиликлар бошланган. Норози ҳайдовчилар раҳбарларини ҳам ишдан олишни талаб қилишган.
«Алишер Ғофуров раҳбарликка умуман нолойиқ. Биз раҳбарни алмаштириб беришини талаб қиламиз. Техникани умуман тушунмайди. Бир масала билан олдига кирсангиз, 5 дақиқадан кейин айтган гапингиз ёдидан чиқиб қолади», – деди ҳайдовчилардан бири.
Таъкидланишича, 5 ой аввал ойликларнинг икки баравар қисқаргани устидан касаба уюшмалари Федерациясига мурожаат қилинган. Лекин ҳеч қандай жавоб берилмаган. Фақат раҳбарият томонидан оғзаки жавоб берилган. Ҳайдовчилардан бирининг сўзларига кўра, бунга сабаб қилиб аудиторлик текшируви кетаётгани важ қилиб кўрсатилган.
UzAutoMotors компаниясининг маълум қилишича, транспорт ташувлари бошқармаси ҳайдовчилари Д.Раҳмонов, Ж.Султонов ва бошқаларнинг ойлик иш ҳақи тўланиши ҳамда ушланмалардан норози бўлиб қилган видеомурожаати ўрганилган.
Аниқланишича, UzAutoMotors АЖ компаниясида айни вақтда иш ҳақидан қарздорлик мавжуд эмас. Жорий йилнинг февраль ойи учун иш ҳақи ўтган ойнинг 20-санасида аванс тариқасида, март ойининг 5-санасида тўлиқ тўлаб берилган. Ходимнинг иш ҳақидан унинг ёзма аризасига асосан кредит тўловлари ҳамда суд қарорига асосан мажбурий ундирув амалга оширилган.
Ушбу мурожаат юзасидан шу куннинг ўзида компания масъул вакиллари ҳамда Андижон вилояти ҳокимлиги, вилоят бандликка кўмаклашиш бошқармаси ходимлари иштирокида ҳайдовчилар билан очиқ мулоқот ўтказилиб, унда UzAutoMotors АЖ томонидан иш ҳақини тўлиқ ҳисоблаб тўлаб берилганлиги, компания томонидан бирор-бир асоссиз ушланмалар амалга оширилмаганлиги, шунингдек, ишчи-ходимларга яратилган ижтимоий ҳимоя пакети, яъни транспортда ишга келиб-кетиши, махсус кийим-бош билан таъминланиши, овқатланиши, тиббий кўриклари учун тўловлар компания ҳисобидан амалга оширилаётганлиги тушунтириб берилган.
Эслатиб ўтамиз, 21 октябрь куни Қашқадарё вилояти Ғузор туманида қурилаётган Uzbekistan GTL заводида ишчиларнинг оммавий тартибсизлиги юз берган. Қурилиш ишларини амалга ошираётган Enter Engineering компанияси тартибсизлик тонгда ишчилар учун мўлжалланган ошхонанинг моноблок ускунаси (электрон ўтказиш тизими)да техник носозликлар юзага келгани боис улар ўз вақтида нонуштага кира олмагани сабабли юз берганини маълум қилди.
Завод масъули Шуҳрат Арзиев ОАВ вакиллари билан мулоқотда Uzbekistan GTL заводи қурилишидаги ишчиларининг оммавий норозилигига уларнинг иш куни кўпайиб, дам олиш куни ўзгаришсиз қолгани ҳам сабаб бўлганини айтган. Uzbekistan GTL бош директори Фахриддин Абдурасулов тўполон кўтарган ишчилар масаласига тўхталиб ўтиб, карантин сабаб уларнинг иш куни ортиб, дам олиш куни ўзгаришсиз қолгани сабаб ишчиларда руҳий толиқиш бўлганини маълум қилганди.
Кейинроқ Uzbekistan GTL заводини қураётган Enter Engineering компанияси Меҳнат кодексининг 161-моддасини, яъни меҳнатга ҳақ тўлаш тартибини қўпол равишда бузгани маълум қилинди.
Изоҳ (0)