Тошкент давлат транспорт университети талабалари дунёнинг яна етти мамлакатида амалиёт ўташ имкониятига эга бўлди, деб хабар беради университет матбуот хизмати.
Маълум қилинишича, 5 март куни Ўзбекистон ва Беларусь ўртасида икки томонлама ҳамкорлик масалалари бўйича бўлиб ўтган Ҳукуматлараро қўшма комиссия йиғилишида Тошкент давлат транспорт университети ва Беларуснинг «Амкодор» компанияси ўртасида ўзаро манфаатли ҳамкорлик тўғрисида келишув имзоланган.
Томонлар университет талабалари ёзги амалиётини «Амкодор» тасарруфидаги жаҳоннинг 7 та мамлакатида жойлашган 30 дан ортиқ корхона ва заводларда маош олган ҳолда стажировкани ўташ масаласини муҳокама қилган.
Музокаралар якунига кўра, ўқув-ишлаб чиқариш амалиётини холдинг тасарруфидаги корхона ва заводларда ўтказган талабалар университетни муваффақиятли тугатганларидан сўнг ишга жойлаша олишлари мумкинлиги тўғрисида келишувга эришилган.
Аввалроқ Беларусь бош вазири ўринбосари бошчилигидаги делегация Ўзбекистонга келиши ва делегация аъзолари мамлакатдаги университет ректорлари билан учрашиши тўғрисида хабар берилганди.
Изоҳ (0)